पंजाबमधील ४ हत्या प्रकरणांतील दोघांना गोव्यात अटक

पणजी : पंजाबमधील ४ हत्या प्रकरणांमध्ये पोलीस शोध घेत असलेल्या २ आरोपींना गोव्यात झुवारीनगर, सांकवाळ येथून अटक करण्यात आली. अमृतसर पोलिसांच्या विशेष पथकाने गोवा पोलिसांच्या गुन्हे शाखेच्या साहाय्याने अमृतसर येथील २२ वर्षीय सामलवल गुरुनान सिंह आणि २२ वर्षीय अमृत केवल सिंह यांना अटक केली. हे दोघे झुुवारीनगर येथे भाड्याच्या खोलीत लपून राहिले होते. (गोव्यात भाडेकरूची पडताळणी होत नसल्याने आणि मालक भाडेकरूंची माहिती पोलिसांना देत नसल्यानेच गुन्हेगारांचे फावते ! – संपादक) सामलवल सिंह याने ४ जणांची हत्या करून तो पंजाबमधून पळून गेल्याची माहिती पोलिसांनी दिली. हे दोघे भारतीय दंड संहिता कलम ३०२ (हत्या), १२० ब (गुन्हेगारी कट) आणि  शस्त्रास्त्र कायद्याच्या कलम २५ आणि २७ अंतर्गत गुन्ह्यांमध्ये पोलिसांना हवे होते.