पटियाला गुरुद्वारामध्ये महिलेची हत्या : मारेकर्‍याला अटक

गुरुद्वाराच्या परिसरात महिला दारू पित बसली असल्याचा आरोप

अमृतसर (पंजाब) – पटियाला गुरुद्वारामध्ये १४ मे या दिवशी निर्मलजीत सिंह नावाच्या व्यक्तीने एका महिलेची गोळ्या झाडून हत्या केली. महिला ‘गुरुद्वारा दुःख निवारण साहिब’च्या परिसरात तलावाजवळ दारू पित बसली होती, असा आरोप आहे. परविंदर कौर असे हत्या झालेल्या महिलेचे नाव आहे. या गोळीबारात एक सेवेकरीही घायाळ झाला आहे. मारेकरी सिंह हा पटियाला येथील रहिवासी असून त्याला अटक करण्यात आली आहे.

संबंधित ३२ वर्षीय महिला दारू पित असतांना गुरुद्वाराच्या कर्मचार्‍यांनीही तिला रोखण्याचा प्रयत्न केला. ते महिलेला चौकशीसाठी गुरुद्वाराच्या व्यवस्थापकाच्या खोलीत घेऊन जाण्याचा प्रयत्न करत होते. तेव्हा महिलेने कर्मचार्‍यांवर दारूच्या बाटलीने आक्रमण केले. त्याच वेळी निर्मलजीत सिंह तेथे आला आणि त्याने महिलेवर एकापाठोपाठ एक अशा ५ गोळ्या झाडून तिची हत्या केली.