तारांकित प्रश्नांच्या तासिकेत विरोधकांच्या घोषणाबाजीमुळे विधानसभेचे कामकाज २ वेळा स्थगित !

नागपूर, २० डिसेंबर (वार्ता.) – महाविकास आघाडीच्या काळात संमत करण्यात आलेल्या कामांना राज्यशासनाने दिलेल्या स्थगितीच्या विरोधात २० डिसेंबर या दिवशी विरोधकांनी विधानसभेत घोषणाबाजी केली. अध्यक्षांच्या आसनापुढे येऊन विरोधकांनी घोषणा दिल्या. यामुळे अध्यक्षांनी प्रथम १० मिनिटांसाठी, नंतर १५ मिनिटांसाठी सभागृहाचे कामकाज स्थगित केले.

विरोधकांच्या घोषणा चालू असतांनाच तारांकित प्रश्न घेण्यात आले. गोंधळाच्या स्थितीमुळे प्रश्नोत्तराच्या तासिकेला केवळ दोनच तारांकित प्रश्न होऊ शकले. अध्यक्ष राहुल नार्वेकर यांनी तारांकित प्रश्नानंतर २ मिनिटे बोलण्यासाठी वेळ देण्याचे आश्वासन देऊनही विरोधकांनी घोषणाबाजी चालूच ठेवली. त्यामुळे अध्यक्षांनी सभागृहाचे कामकाज स्थगित केले.