जम्मू येथील सीमेवरील गावात पाकने ड्रोनद्वारे पाठवलेला शस्त्रसाठा जप्त

पोलिसांची रायफल घेऊन पळून जाणारा जिहादी आतंकवादी ठार

जम्मू – येथील आंतरराष्ट्रीय सीमेजवळील टोफ गावामध्ये पाकमधून ड्रोनच्या साहाय्याने पाठवण्यात आलेला शस्त्रसाठा जप्त करण्यात आला. अटकेत असलेला लष्कर-ए-तोयबाचा जिहादी आतंकवादी महंमद अली हुसेन उपाख्य कासिम उपाख्य जहांगीर याने दिलेल्या माहितीवरून हा साठा जप्त करण्यात आला. हा साठा शोधण्यासाठी पोलिसांनी हुसेन याला घटनास्थळी नेले होते. तेव्हा त्याने पोलिसांकडून रायफल खेचून गोळीबार करत पळण्याचा प्रयत्न केला असता पोलिसांनी केलेल्या गोळीबारात तो ठार झाला. सापडलेल्या शस्त्रसाठ्यामध्ये १ ‘एके ४७’ रायफल, १ मॅगझिन, ४० काडतुसे, १ पिस्तूल, दोन मॅगझिन, १० काडतुसे आणि २ ग्रेनेड होते.