शिवजयंतीनिमित्त फोंड्यात निघालेल्या भव्य शिवमहारथ यात्रेत ५ सहस्र शिवप्रेमींचा सहभाग

फोंडा – छत्रपती शिवाजी महाराज यांच्या जयंतीनिमित्त फोंडा येथील हिंदवी स्वराज्य संघटनेच्या वतीने भव्य शिवमहारथ यात्रा काढून शिवजयंती साजरी करण्यात आली. भगव्या ध्वजांसह फेटे घालून युवक, महिला आणि लहान मुले यांसह ५ सहस्र शिवप्रेमी या यात्रेत सहभागी झाले होते. यामुळे फोंड्यातील वातावरण शिवमय झाले होते. ‘कार्यातून माणसे जोडणे, हाच आमचा धर्म आहे’, असे या वेळी हिंदवी स्वराज्य संघटनेच्या पदाधिकार्‍यांनी सांगितले. फर्मागुडी येथील छत्रपती शिवाजी महाराजांच्या अश्‍वारूढ पुतळ्याला पुष्पहार अर्पण करून पायी आणि दुचाकींसह निघालेल्या यात्रेला फर्मागुडी येथील किल्ल्यापासून आरंभ झाला. कुर्टी येथील नागा मशीद जंक्शन येथून कोटमार्गे दादा वैद्य चौक परिसरातून जुने बसस्थानक येथे यात्रेची सांगता करण्यात आली.