Recognize Israel : नागरी अणू करारासाठी सौदी अरेबियाने इस्रायलला मान्यता द्यावी !

वॉशिंग्टन (अमेरिका) – अमेरिका आणि सौदी अरेबिया यांच्यातील महत्त्वपूर्ण नागरी अणू सहकार्य करार पुढे नेण्यासाठी सौदी अरेबियाने इस्रायलला मान्यता देणे, ही एक अट असेल. सौदी अरेबियाने इस्रायलला मान्यता दिल्याविना हा करार पूर्णत्वास जाणार नाही, असे वक्तव्य अमेरिकेचे राष्ट्राध्यक्ष डॉनल्ड ट्रम्प यांनी ‘ट्रुथ सोशल’ या त्यांच्या सामाजिक माध्यमावर केले. ट्रम्प प्रशासनाने हा करार अधिकृतपणे स्वाक्षरीत केल्यानंतर काही काळानंतरच ट्रम्प यांनी हे विधान आले आहे. या कराराद्वारे सौदी अरेबियाला शांततापूर्ण उद्देशांसाठी अणूऊर्जा कार्यक्रम विकसित करण्यास साहाय्य केले जाणार आहे. विशेष म्हणजे गेल्या वर्षी ट्रम्प यांनी इस्रायलला मान्यता देण्याची अट या प्रक्रियेतून वगळल्यानंतरच हा करार पुढे सरकला होता.

ट्रम्प पुढे म्हणाले की, या कराराला जरी संमती देण्यात आली असली, तरी तो पूर्णपणे सौदी अरेबियाच्या ‘अब्राहम करारा’मध्ये (अमेरिकेच्या पुढाकाराने इस्रायल आणि संयुक्त अरब अमिरात, बहरीन, मोरोक्को, तसेच सुदान यांच्यात संबंध सामान्य करण्यासाठी करण्यात आलेल्या करारामध्ये) सहभागी होण्यावर अवलंबून आहे. हे करार मध्यपूर्वेतील शांतता आणि सहकार्य यांच्या दृष्टीने महत्त्वाचे ठरले असून प्रस्तावित अणू सहकार्य करार केवळ शांततापूर्ण आणि सैनिकी नसलेल्या उद्देशांसाठीच मर्यादित राहील. तसेच या अंतर्गत अणूसाहित्याचे संवर्धन केले जाणार नाही.

इराण अण्वस्त्रसज्ज झाल्यास आम्हीही अण्वस्त्रे विकसित करू ! – महंमद बिन सलमान

ऊर्जा स्रोतांमध्ये वैविध्य आणण्यासाठी सौदी अरेबिया दीर्घकाळापासून नागरी अणूऊर्जा कार्यक्रम विकसित करण्याचा प्रयत्न करत आहे. ‘इराण अण्वस्त्रसज्ज राष्ट्र बनल्यास सौदी अरेबियाही अण्वस्त्रे विकसित करण्याचा विचार करील’, असे सौदी अरेबियाचे युवराज महंमद बिन सलमान यांनी यापूर्वीच स्पष्ट केले आहे. त्यामुळे हा करार अमेरिका-सौदी अरेबिया संबंध अधिक दृढ करण्यासह इराणचा प्रभाव मर्यादित ठेवण्याच्या अमेरिकेच्या धोरणाचाही भाग मानला जात आहे.