अमरावती येथे विजेच्या झटक्याने ४ कर्मचार्‍यांचा मृत्यू !

आमदार प्रवीण पोटे यांच्या महाविद्यालयातील घटना

अमरावती – येथील कठोरा रस्त्यावरील पी.आर्. पोटे पाटील एज्युकेशन महाविद्यालयाच्या मुख्य प्रवेशद्वारासमोर २९ डिसेंबर या दिवशी सकाळी ११ वाजताच्या सुमारास लोखंडी शिळीमध्ये विद्युत् प्रवाह येऊन महाविद्यालयातील ४ शिपाई कर्मचार्‍यांचा मृत्यू झाला. अक्षय सावरकर, प्रशांत शेलोरकर, संजय दंडनाईक आणि गोकुळ वाघ, अशी मृत्यू झालेल्यांची नावे आहेत.

मुख्य प्रवेशद्वारासमोरून उच्च दाबाची विद्युत् तारेची वाहिनी गेली आहे. महाविद्यालयाचे हे ४ शिपाई मुख्य प्रवेशद्वाराचे रंग रंगोटी करत असतांना लोखंडी शिळीची विद्युत् तारेला स्पर्श झाल्याने ही घटना घडली. विद्युत् प्रवाह इतका अधिक होता की लोखंडी शिळीचे पाय जागीच वितळले. याप्रकरणी हलगर्जीपणा करणार्‍यांवर गुन्हे नोंद करण्याची मागणी जोर धरू लागली आहे. घटनेची माहिती मिळताच खासदार नवनीत राणा जिल्हा रुग्णालयात येऊन मृत झालेल्या कर्मचार्‍यांच्या कुटुंबांशी संवाद साधला.