Sikkim Tunnel Accident : सिक्किममधील निर्माणाधीन बोगद्यात दरड कोसळली : ८ कामगारांचा मृत्यू

गंगटोक (सिक्किम) – राज्यातील नामची येथे निर्माणाधीन (काम चालू असलेल्या) बोगद्यात दरड (डोंगराचा तुटलेला कडा) कोसळून झालेल्या भीषण दुर्घटनेत ८ कामगारांचा मृत्यू झाला,तर २७ कामगार अजूनही ढिगार्‍याखाली अडकले आहेत. २० जुलैला हा अपघात झाला. हा बोगदा ‘नॅशनल हायड्रोइलेक्ट्रिक पॉवर कॉर्पोरेशन’च्या ‘तिस्ता स्टेज-६’ जलविद्युत् प्रकल्पाचा भाग म्हणून बांधला जात होता. या बोगद्याचे प्रवेशद्वार २० जुलै या दिवशी दरड कोसळल्याने बंद झाले.

१. अपघातानंतर बोगद्यात मिथेन वायूची गळती होऊन तोे दीड किलोमीटरपर्यंत पसरला. ऑक्सिजनची कमतरता भासल्यामुळे आणि गुदमरल्यामुळे ८ कामगारांचा मृत्यू झाल्याची माहिती प्रशासनाने दिली.

२. अडकलेल्यांमध्ये ‘पटेल इंजिनिअरिंग’ आस्थापनाचे २१ आणि ‘नॅशनल हायड्रोइलेक्ट्रिक पॉवर कॉर्पोरेशन’चे ६ कर्मचारी यांचा समावेश असल्याचे सांगण्यात आले.

३. घटनास्थळी राष्ट्रीय आपत्ती प्रतिसाद दल, राज्य आपत्ती प्रतिसाद दल, पोलीस आणि अग्निशमन दल यांच्याकडून युद्धपातळीवर बचावकार्य चालू आहे.

४. मिथेन वायू, अंधार आणि ऑक्सिजनची कमतरता यांमुळे बचाव कार्यात मोठ्या अडचणी येत असून विशेष ‘अँटी-गॅस गिअर’सह अतिरिक्त बचाव पथकेही पाचारण करण्यात आली आहेत. मृतांची ओळख अद्याप उघड केलेली नाही.