बांदा-दोडामार्ग रस्त्याच्या कामासाठी आजपासून भाजपचे पुन्हा आंदोलन

दोडामार्ग – बांदा-दोडामार्ग-आयी, तसेच दोडामार्ग ते वीजघर या मार्गांच्या दुरवस्थेविषयी प्रशासनाचे लक्ष वेधूनही आतापर्यंत कोणतीही कार्यवाही झाली नाही. त्यामुळे प्रशासनाच्या नाकर्तेपणाच्या विरोधात ८ नोव्हेंबरपासून जनआंदोलन आणि उपोषण करण्यात येईल, अशी चेतावणी दोडामार्ग भाजपच्या वतीने प्रसिद्धीपत्रकाद्वारे दिली आहे. सार्वजनिक बांधकाम विभाग जाणीवपूर्वक या रस्त्यांच्या कामांकडे दुर्लक्ष करत आहे. या रस्त्यांच्या कामाची निविदा काढणे आणि कार्यारंभ आदेश काढणे यांस विलंब होण्यास उत्तरदायी कोण ? याविषयी वरिष्ठ अधिकार्‍यांची भेट घेऊनही आश्‍वासन देण्यापलीकडे काहीही झालेले नाही. त्यामुळे आंदोलन करण्यात येणार आहे, असे या पत्रकात म्हटले आहे. या रस्त्यांच्या कामासाठी यापूर्वीही भाजपच्या वतीने आंदोलन करण्यात आले, तसेच निवेदने देऊन प्रशासनाचे लक्ष वेधण्यात आले होते.