शिखर शिंगणापूर येथील शंभू महादेव यात्रा रहित ! – शेखर सिंह, जिल्हाधिकारी, सातारा

सातारा – लाखो भाविकांचे श्रद्धास्थान असलेल्या शिखर शिंगणापूर येथील शंभू महादेवाची वार्षिक चैत्र यात्रा कोरोनाच्या संसर्गामुळे रहित करण्यात आली आहे, याविषयीचे आदेश जिल्हाधिकारी शेखर सिंह यांनी २० एप्रिल या दिवशी घोषित केले.

शिंगणापूर येथील शंभू महादेवाच्या वार्षिक यात्रेचा कालावधी १७ ते २७ एप्रिल असा असून यात्रेचा मुख्य दिवस २३ आणि २४ एप्रिल हा आहे. शिखर शिंगणापूर येथील शंभू महादेव यात्रेस सातारा जिल्ह्यातील तसेच सोलापूर, अहमदनगर, लातूर, परभणी, हिंगोली, नांदेड, बुलढाणा, सांगली, धाराशीव, बीड या जिल्ह्यांतूनही भाविक मोठ्या प्रमाणावर येत असून जिल्ह्यातून येणार्‍या भाविकांना त्यांच्या जिल्ह्याच्या सीमेवर अटकाव करण्यात येणार असल्यामुळे कोणीही या यात्रेसाठी येऊ नये, असे जिल्हाधिकारी शेखर सिंह यांनी आदेशात नमूद केले आहे.