पुण्यात सराईत गुन्हेगार आणि निवृत्त पोलीस कर्मचार्‍यामधील झटापटीत गुन्हेगाराचा मृत्यू !

पुणे – येथील सराईत गुन्हेगार मनिष काळूराम भोसले (वय २० वर्षे) आणि निवृत्त पोलीस कर्मचारी अनंत तुळशीराम ओव्हाळ (वय ६१ वर्षे) यांच्यात झालेल्या झटापटीत सराईत गुन्हेगाराचा मृत्यू झाला आहे. खडकी पोलीस स्टेशनच्या क्षेत्रात १२ एप्रिल या दिवशी ही घटना घडली. या सराईत गुन्हेगाराने मद्याच्या नशेत रस्त्याने जाणार्‍या एका निवृत्त पोलीस कर्मचार्‍याची दुचाकी अडवली. त्यानंतर या दोघांमध्ये झालेल्या झटापटीत गुन्हेगाराचा जीव गेला. पोलिसांनी या प्रकरणी हत्येचा गुन्हा नोंद केला असून निवृत्त कर्मचार्‍याला अटक केली आहे. या घटनेचे सीसीटीव्ही फूटेज व्हायरल झाले आहे. अनंत ओव्हाळ हे बोपोडीतील आनंदनगर परिसरात काही कामानिमित्त गेले होते. या वेळी मनिष भोसलेने त्यांची दुचाकी अडवत त्यांच्यासोबत वाद घातला. यानंतर दोघांनीही एकमेकांना मारहाण केली. दरम्यान प्रसारित झालेल्या व्हिडिओमध्ये आरंभी मनिषने अनंत ओव्हाळ यांना मारहाण केल्याचे दिसत आहे. यानंतर अनंत यांनीही त्याला मारहाण केली. त्यानंतर खाली पडलेल्या मनिषच्या छातीत अनंत ओव्हाळ यांनी लाथा घातल्याचे सीसीटीव्ही फुटेजमध्ये दिसत आहे.