कोरोनाच्या पार्श्‍वभूमीवर पिंगुळी येथील प.पू. सद्गुरु समर्थ राऊळ महाराज समाधीमंदिर बंद

कुडाळ – कोरोनाची साथ आटोक्यात येईपर्यंत तालुक्यातील पिंगुळी येथील प.पू. सद्गुरु समर्थ राऊळ महाराज समाधीमंदिर, तसेच समाधीमंदिर परिसरातील दत्तमंदिरासह सर्व मंदिरे आणि येथील अन्नदान सेवा तात्पुरती बंद ठेवण्यात येत असल्याची माहिती प.पू. विनायक (अण्णा) राऊळ महाराज यांनी दिली.

श्री क्षेत्र पिंगुळी येथे भाविकांची सतत वर्दळ असते. प्रतिदिन दुपारी आणि रात्री ३०० भाविक अन्नदान सेवेचा लाभ घेतात; परंतु सध्या कोरोनाचा संसर्ग पुन्हा वाढू लागला आहे. रुग्णसंख्याही झपाट्याने वाढत असून त्यावर उपाययोजना म्हणून उपरोक्त मंदिरांसह अन्नदान सेवा बंद ठेवण्याचा निर्णय घेण्यात आला आहे. या कालावधीत श्रींची नित्यपूजा, आरती, अभिषेक आदी दैनंदिन सेवा सेवेकर्‍यांच्या वतीने चालू रहाणार आहेत. त्यामुळे भाविकांनी सहकार्य करावे, असे आवाहन प.पू. विनायक (अण्णा) राऊळ महाराज यांनी केले आहे.