पंढरपूर (जिल्हा सोलापूर) येथे भाजपच्या नेत्याला काळे फासणार्‍या २५ शिवसैनिकांवर गुन्हा नोंद

पंढरपूर (जिल्हा सोलापूर) – शिवसेनाप्रमुख तथा मुख्यमंत्री उद्धव ठाकरे यांच्याविषयी अपशब्द वापरल्याप्रकरणी भाजप नेते शिरीष कटेकर यांना शिवसेनेच्या कार्यकर्त्यांनी तोंडाला काळे फासले, तसेच त्यांना मारहाण करण्यात आली. या प्रकरणी पंढरपूर येथील शिवसेनेच्या शहराध्यक्षांसह २५ जणांवर गुन्हा नोंद करण्यात आला आहे. त्यातील १७ जणांना अटक करण्यात आली आहे. याविषयी शिरीष कटेकर यांनी पंढरपूर शहर पोलीस ठाणे येथे तक्रार प्रविष्ट केली होती.

४ फेब्रुवारी या दिवशी भाजपच्या वतीने राज्यात वीजदेयक वसुलीविरुद्ध आंदोलन करण्यात आले. या आंदोलनात भाजप नेते शिरीष कटेकर यांनी मुख्यमंत्री उद्धव ठाकरे यांच्यावर टीका केली होती. त्यामुळे संतापलेल्या शिवसैनिकांनी ६ फेब्रुवारी या दिवशी कटेकर यांच्या तोंडाला काळे फासले होते.