गुरुद्वार बांधकामाच्या हिशेबातून दोन गटांत मारामारी

सात जणांना अटक

पुणे – गुरुद्वाराच्या बांधकाम व्ययाचा हिशेब मागितल्याच्या कारणातून दोन गटांत मारामारी झाली. दोन्ही गटांतील लोकांनी एकमेकांवर तलवारीने आक्रमण केले. या प्रकरणी वानवडी पोलीस ठाण्यात दोन्ही गटांनी एकमेकांवर मारामारीचा गुन्हा नोंद केला आहे. यात पोलिसांनी सात जणांना अटक केली आहे.

कृष्णसिंग कल्याणी आणि त्यांचे नातेवाईक हे गुरुद्वारा कमिटीचे सदस्य असून ते गुरुद्वाराच्या बांधकामाचा हिशेब मागण्यासाठी गुरुद्वारा कमिटीच्या इतर सदस्यांकडे गेले होते. या वेळी हिशेबावरून वादावादी होऊन दोन्ही गटांत मारामारी झाली. कृष्णसिंग कल्याणी आणि नेपालसिंग कल्याणी यांनी परस्परांविरोधात पोलिसांकडे तक्रारी प्रविष्ट केल्या आहेत.