नागपूर येथे नायलॉन मांजाने गळा कापल्याने तरुणाचा मृत्यू

वारंवार घडणार्‍या अशा घटनांमुळे नुसती नायलॉन मांजा विक्रीवर बंदी न घालता मांजाची विक्री करणारे आणि ते वापरणारे यांवर महापालिका प्रशासनाने कठोर कारवाई करणे आवश्यक आहे !

नागपूर – नायलॉन मांजाने गळा कापून प्रणय ठाकरे (वय २० वर्षे) या तरुणाचा मृत्यू झाला आहे. गेल्या १० दिवसांत नायलॉन मांजाने घेतलेला प्रणय हा तिसरा बळी आहे. यापूर्वी २ मुलांनी नायलॉन मांजामुळे जीव गमावला आहे. प्रणय आपल्या दुचाकीवरून जात असतांना त्या वेळी वाटेत दोघे जण अडकलेला मांजा ओढत होते. या वेळी मांजाने प्रणय याचा गळा कापला गेल्याने तो खाली पडला. लोकांनी त्याला रुग्णालयात भरती करेपर्यंत पुष्कळ रक्तस्राव झाला होता. रुग्णालयात नेताच आधुनिक वैद्यांनी त्याला मृत घोषित केले. ही घटना ताजी असतांनाच मानेवाड्यात सौरभ पाटणकर (वय २२ वर्षे) याचा मांजामुळे हात कापल्याची घटना घडली.