अहमदनगरचे अंबिकानगर नामांतर करा ! – सदाशिव लोखंडे, खासदार, शिवसेना

नगर – औरंगाबादच्या नामांतराचा जुना वाद पुढे आल्यानंतर आता अहमदनगरच्या नामांतराची मागणी होत आहे. शिर्डी येथील शिवसेनेचे खासदार सदाशिव लोखंडे यांनी अहमदनगरचे नामांतर अंबिकानगर करण्यात यावे, अशी मागणी ३ जानेवारी या दिवशी पत्रकारांशी बोलतांना केली. औरंगाबादचे नामांतर ‘संभाजीनगर’ व्हावे, ही जनतेची इच्छा आहे. त्यासंबंधी आमचे पक्षप्रमुख तथा मुख्यमंत्री उद्धव ठाकरे योग्य तो निर्णय घेतील; मात्र औरंगाबादपाठोपाठ अहमदनगरचेही नामांतर होऊन या शहराला ‘अंबिकानगर’ नाव देण्यात यावे, अशी आमची मागणी असल्याचे खासदार लोखंडे यांनी सांगितले.

गेल्या अनेक वर्षांपासून शिवसेनेसह हिंदुत्वनिष्ठ संघटनांकडून अहमदनगरच्या नामांतराची मागणी चालू आहे. अर्थात त्यावरून काहींमध्ये मतभेद आहे. काहींनी ‘अंबिकानगर’, तर काहींनी ‘आनंदनगर’ नाव सुचवले आहे. ‘अंबिकानगर’ नाव देण्याची मागणी जुनी आहे. यावरून अनेकदा आंदोलनेही झाली आहेत. नगरला यापूर्वी भरलेल्या ७० व्या साहित्य संमेलनातही हे सूत्र उपस्थित झाले होते.