प्रसिद्धी पराङ्मुख आणि इतरांना साहाय्य करणारे ६५ टक्के आध्यात्मिक पातळीचे मुंबई येथील सनदी लेखापाल (चाटर्ड अकाऊंटंट) श्री. मनीष पारेख (वय ६० वर्षे) !

१. वेळेचे गांभीर्य 

‘आम्ही श्री. पारेखसरांकडे जाण्यापूर्वी त्यांना विचारून भेटण्याची वेळ (‘अपॉइंटमेंट’) ठरवतो. त्या वेळी ते आमच्या आधी कार्यालयात उपस्थित असतात.

२. इतरांचा विचार करणे  

‘पारेखसरांना कार्यालयात येण्यास कधी उशीर झाला किंवा त्यांची नियोजित भेट रहित झाली’, असे अजूनपर्यंत कधीही झाले नाही. त्यांना काही वेळा अकस्मात् कामासाठी बाहेर जावे लागणार असेल, तर ते स्वतःहून भ्रमणभाष करून आम्हाला तसे सांगतात. आमचे त्यांना भेटण्याचे ठरले असूनही आम्हाला काही कारणास्तव त्या वेळी जाणे शक्य नसल्यास आम्ही त्यांना तसे कळवल्यावर ते आम्हाला समजून घेतात.

३. शांत आणि स्थिर  

आम्ही पारेखसरांचे मार्गदर्शन घेण्यासाठी त्यांच्या कार्यालयात जातो. त्या वेळी त्यांच्याकडे कामाची कितीही तातडी असली, तरीही ते पुष्कळ शांत आणि स्थिर असतात. ते काम करत असतांना त्यांच्या कार्यालयातील कुणीही त्यांना काही विचारले, तरीही ते त्यांना शांतपणे उत्तर देतात.

४. ते आश्रमातील साधकांचीही आवर्जून विचारपूस करतात.

५.  सेवेच्या संबंधित परिपूर्ण अभ्यास करणे 

आम्ही त्यांना सेवेच्या संदर्भात सांगितल्यावर त्यातील त्रुटी त्यांच्या त्वरित लक्षात येतात. ते आम्हाला नेमकेपणाने त्याच सूत्राविषयी विचारतात आणि त्याविषयी अचूकतेने सांगतात. तेव्हा ‘त्यांचा अभ्यास किती परिपूर्ण आहे’, हे आम्हाला शिकायला मिळते. आम्ही त्यांना एखादे सूत्र विचारले आणि त्यांना त्याविषयी काही शंका असल्यास ते स्वतःहून त्या क्षेत्रातील तज्ञांना विचारून निश्चिती करतात आणि आम्हाला त्याविषयी कळवतात.

६. प्रसिद्धी पराङ्मुख आणि अल्प अहं 

अ. श्री. पारेख यांची सनदी लेखापाल म्हणून मोठी ‘फर्म’आहे. ते अनेक वर्षे या क्षेत्रात काम करत आहेत; मात्र त्यांच्या बोलण्यातून किंवा वागण्यातून अहं जराही जाणवत नाही.

आ. ‘ते आम्हाला साहाय्य करत असल्याविषयी त्यांच्या मनात जराही कर्तेपणा जाणवत नाही. त्यांचा सच्चिदानंद परब्रह्म डॉ. आठवले यांच्याप्रती भाव असल्याने ते निरपेक्षपणे सेवा करत आहेत.

इ. ते ‘सनातन राष्ट्र शंखनाद महोत्सव आणि श्री राजमातंगीदेवी महायज्ञ’ यांसारख्या कार्यक्रमांना उपस्थित रहातात; मात्र त्या वेळी ‘कार्यक्रमात मानसन्मान मिळावा’, अशी त्यांची कोणतीच अपेक्षा नसते.

७. श्री. पारेख यांच्यात जाणवलेले पालट 

अ. पारेखसरांचा चेहरा पूर्वीपेक्षा आनंदी दिसतो. ते शांत आणि स्थिर वाटतात.

आ. आता ते मोकळेपणाने बोलतात.

इ. पूर्वी ते आमच्याशी केवळ सेवेच्या संदर्भातच बोलत असत. आता ते स्वतःहून आम्हाला संस्थेच्या कार्याविषयी विचारतात आणि जाणून घेतात.’

– सौ. तनुजा गाडगीळ (आध्यात्मिक पातळी ६५ टक्के, वय ३८ वर्षे) आणि श्री. संदीप सकपाळ (आध्यात्मिक पातळी ६६ टक्के, वय ४६ वर्षे), सनातन आश्रम, देवद, पनवेल. (२२.६.२०२६)