मिरज येथे भक्तीमय वातावरणात ‘बाळगोपाळ दिंडी सोहळा’ उत्साहात !

सनातन संस्था आणि अन्य सेवाभावी संस्था यांचा श्रीफळ देऊन सन्मान

मिरज (जिल्हा सांगली), २६ जुलै (वार्ता.) – येथील वाळवे गल्ली परिसरातील शिव विठ्ठल मंदिराच्या वतीने आषाढी एकादशीच्या शुभमुहूर्तावर ‘बाळगोपाळ दिंडी सोहळा’ आणि भक्तीगीतांचा भावपूर्ण कार्यक्रम आयोजित करण्यात आला होता. या सोहळ्याचा अनेक महिला आणि पुरुष भक्तांनी लाभ घेतला.

प्रतिवर्षाप्रमाणे यंदाही या दिंडीमध्ये विविध शाळांतील विद्यार्थी-विद्यार्थिनी, शिक्षक, वारकरी, भाविक, धर्माभिमानी नागरिक, सेवाभावी संस्थांचे प्रतिनिधी आणि लोकप्रतिनिधी मोठ्या संख्येने सहभागी झाले होते. या दिंडीत देवता आणि संत यांच्या वेशभूषेत नटलेले बाळगोपाळ सर्वांचे लक्ष वेधून घेत होते. संतांच्या पालख्या, घोडे, टाळ-मृदंगाचा गजर आणि फडकणारे भगवे ध्वज यांमुळे संपूर्ण मिरज नगरी विठ्ठलनामाच्या गजराने दुमदुमून गेली होती. मिरज मार्केट परिसरात टाळ-मृदंगाच्या तालावर बाळगोपाळांचे नयनरम्य रिंगण पार पडले.

‘गुरुपौर्णिमा महोत्सवा’चे निमंत्रण आणि सत्कार !

या प्रसंगी सनातन संस्थेच्या वतीने उपस्थित सर्व भाविक आणि धर्माभिमानी यांना आगामी ‘गुरुपौर्णिमा महोत्सवा’चे निमंत्रण देण्यात आले. दिंडीची सांगता झाल्यानंतर धर्मकार्य आणि समाजकार्य यांत योगदान देणार्‍या सनातन संस्थेसह विविध सेवाभावी संस्थांचा आयोजकांच्या वतीने श्रीफळ देऊन विशेष सत्कार करण्यात आला.