श्रीरामरक्षास्तोत्रात ‘एकटेपणा जाणवणे’ आणि ‘असुरक्षित वाटणे’ या समस्यांच्या निवारणाचा उपाय असणे 

‘एखादी व्यक्ती तिचे कुटुंबीय, नातेवाईक आणि मित्र यांपासून दूर असते. त्यामुळे तिला एकटेपणा जाणवतो, तसेच तिला ‘नोकरी जाणे, इतरांशी तुलना करणे, आर्थिक हानी होणे, मृत्यूची भीती वाटणे’ यांमुळे तिच्या भविष्यकाळाविषयी चिंता वाटते. परिणामी तिला जीवनात असुरक्षितता वाटते. श्रीरामरक्षास्तोत्रात अशा समस्यांचे निवारण होण्यासाठी पुढील श्लोक दिला आहे.

माता रामो, मत्पिता रामचन्द्रः ।
स्वामी रामो, मत्सखा रामचन्द्रः ।
सर्वस्वम् मे, रामचन्द्रो दयालुर्,
नान्यञ् जाने, नैव जाने न जाने ॥ ३० ॥

अर्थ : राम माझी माता, राम माझे पिता, राम माझा स्वामी, राम माझा सखा आहे. दयाळू रामचंद्र हे माझे सर्वस्व आहे. ‘रामाविना मी अन्य काहीही जाणत नाही’, असे मी त्रिवार सांगतो.

वरील श्लोक मनोभावे आणि अर्थ समजून ३ वेळा म्हटला, तरी व्यक्तीला जाणवणारा एकटेपणा आणि असुरक्षितता न्यून होण्यास साहाय्य होते.’

– श्री. राम होनप (सूक्ष्मातील ज्ञानप्राप्तकर्ता साधक), सनातन आश्रम, रामनाथी, गोवा. (२१.६.२०२६)