स्वतःच्या, तसेच साधकांच्या साधनेविषयी तत्त्वनिष्ठ असलेल्या ६७ टक्के आध्यात्मिक पातळीच्या सौ. सुप्रिया माथूर (वय ४३ वर्षे) !

‘सौ. सुप्रिया माथूर (आध्यत्मिक पातळी ६७ टक्के, वय ४३ वर्षे) या स्वभावदोष आणि अहं यांच्या निर्मूलनाची प्रक्रिया राबवणार्‍या साधकांच्या व्यष्टी साधनेचा आढावा घेतात. त्या माझा व्यष्टी साधनेचा आढावा घेत असतांना मला जाणवलेली त्यांची गुणवैशिष्ट्ये पुढे दिली आहेत.

१. स्वतःच्या, तसेच साधकांच्या साधनेविषयी तत्त्वनिष्ठ

‘सौ. सुप्रिया माथूर नेहमीच स्वतःविषयी, तसेच ‘इतर साधकांची साधना आणि सेवा’ यांविषयी तत्त्वनिष्ठ असतात. सुप्रियाताई साधकाला त्याच्या प्रत्येक चुकीविषयी अंतर्मुखतेने अन् गांभीर्याने जाणीव करून देतात.

२. सुस्पष्ट बोलणे

त्यांच्यात स्पष्टवक्तेपणा आहे. त्यांचे बोलणे नेहमीच सुस्पष्ट असते. त्यामुळे साधकाला ते त्वरित आकलन होते आणि समजून घेण्यास सोपे जाते.

३. त्यांच्यामध्ये पुष्कळ नम्रता असून त्या क्षमाशीलही आहेत.

४. चुकांविषयी संवेदनशील 

त्यांच्याकडून एखादी कृती करतांना चूक झाली, तर त्या लगेचच संबंधित साधकाची क्षमायाचना करतात. हे मला २ वेळा अनुभवता आले.

५. प्रेमभाव 

मी काही दिवस सुप्रियाताईंच्या समवेत पहाटे सेवेला जात होतो. त्या वेळी त्या सर्वांसाठी प्रथम चहा बनवत असत. ‘मी दुधाचा चहा पिण्याचे बंद केले आहे. मला कोरा चहा आवडतो’, हे त्यांना समजल्यावर त्या माझ्या एकट्यासाठी वेगळा चहा करून घेऊन येत असत. मी त्यांना ‘मला चहा नसला, तरी चालतो’, असे सांगूनही त्या माझ्यासाठी चहा करत असत. त्या मला ‘चहा कसा झाला आहे ?’, असे विचारत असत. एखाद्या वेळी त्या ‘माझ्याकडून आज चहात चहापावडर किंवा साखर अल्प झाली आहे’, असे सांगून माझी क्षमा मागत असत.

६. नामजपादी उपायांचे गांभीर्य 

त्या सेवेत कितीही व्यस्त असल्या, तरीही नामजपादी उपाय सतर्क राहून पूर्ण करतात.

७. निर्णयक्षमता  

त्या अन्नपूर्णाकक्षात सेवेला असतांना संबंधित साधकांना त्या त्या वेळी निर्णय देतात आणि साधकांच्या व्यष्टी साधनेचा आढावा घेण्याची सेवा तेवढ्याच स्थिरतेने आणि लक्षपूर्वक करतात.

८. त्या साधकांच्या व्यष्टी साधनेचा आढावा घेत असतांना साधकांच्या स्थितीप्रमाणे त्यांच्यामध्ये तारक आणि मारक या दोन्ही दैवी रूपांचे दर्शन अनुभवता येते.’

– श्री. गौतमेश अनिल तोरस्कर, कोल्हापूर (१४.४.२०२६)