(म्हणे) ‘श्रीरामजन्मभूमी तीर्थक्षेत्र न्यासामध्ये एखादा मुसलमान असता, तर चोरीवरून त्याचे ‘एन्काऊंटर’ झाले असते !’ – Asaduddin Owaisi

(एन्काऊंटर म्हणजे पोलीस चकमकीत ठार मारणे)

बिजनौर (उत्तरप्रदेश) – श्रीराममंदिरातील दान चोरीच्या प्रकरणी ‘श्रीरामजन्मभूमी तीर्थक्षेत्र न्यासा’ने चूक केली आहे. जर या न्यासामध्ये एखादा मुसलमान असता आणि हे प्रकरण समोर आले असते, तर त्याचे ‘एन्काऊंटर’ केले असते, त्याचे घर बुलडोझरद्वारे  पाडले असते आणि विषय संपवला असता; पण सध्या (न्यासाचे मुख्य) चंपक (राय) हे मजेत आहेत, सर्व चंपक मजेत आहेत. तुम्हीच सांगा काय चालले आहे ? कुणाचे घर पाडले जात नाही. ज्यांना अटक केली गेली, त्यांना पोलीस कोठडीत ठेवण्यात आले नाही, अशी टीका ए.आय.एम्.आय.एम्. (ऑल इंडिया मजलिस-ए-इत्तेहादुल मुस्लिमीन – अखिल भारतीय मुस्लिम एकता संघाचे) अध्यक्ष खासदार असदुद्दीन ओवैसी यांनी पत्रकारांशी बोलतांना केली.