Karnataka Bangladeshi Infiltrators : कर्नाटक राज्यात अवैध बांगलादेशी घुसखोरांची संख्या १३ सहस्रांहून अधिक !

राज्याच्या गृह विभागाच्या अहवालातील माहिती

बेंगळुरू/मैसुरू (कर्नाटक) – कर्नाटक राज्य गृह विभागाने बांगलादेशी घुसखोरांची सूची सिद्ध केली आहे. त्यानुसार सरकारला राज्यात एकूण १३ सहस्र ६७५ घुसखोर असल्याचे आढळून आले. राजधानी बेंगळुरूत सर्वाधिक, म्हणजे १० सहस्र ६५० घुसखोर वास्तव्यास आहेत. त्या पाठोपाठ मैसुरू (८१०), बेळगाव (४५८), दक्षिण कन्नड (२६८) आणि रामनगर (१९१) या जिल्ह्यांत अधिक प्रमाणात घुसखोर असल्याची माहिती अहवालात नमूद करण्यात आली आहे. यासह अन्यही जिल्ह्यांमध्ये घुसखोर वास्तव्यास आहेत.

मैसुरूत बांगलादेशी घुसखोर येत असल्याची अफवा पसरल्यानंतर मैसुरू रेल्वे स्थानकावर रेल्वे पोलीस सतर्क झाले आहेत. बंगालहून आलेल्या हावडा एक्स्प्रेसमध्ये पडताळणी करण्यात आली. यापूर्वी बंगालहून आलेल्या लोकांना बांगलादेशी घुसखोर असल्याचा आरोप केल्यामुळे मोठा गदारोळ झाला होता. तथापि कागदपत्रांच्या पडताळणीच्या वेळी त्यांपैकी एकही बांगलादेशी घुसखोर नसल्याचे स्पष्ट झाले. त्यामुळे अफवांना आळा घालण्यासाठी या वेळी रेल्वे पोलिसांनी स्वतःहून पडताळणी करण्याचे पाऊल उचलले आहे.