सनातन प्रभात > Post Type > बातम्या > राष्ट्रीय बातम्या > Nashik Kumbh Mela 2027 : नाशिक येथे सिंहस्थ कुंभपर्व ध्वजस्तंभ शिलान्यास पूजन सोहळा पार पडला !

Nashik Kumbh Mela 2027 : नाशिक येथे सिंहस्थ कुंभपर्व ध्वजस्तंभ शिलान्यास पूजन सोहळा पार पडला !

कुंभपर्व यशस्वी करण्यासाठी सर्वांचा सहभाग आवश्यक ! - गिरीश महाजन, कुंभमेळा मंत्री

नाशिक – येथे पुढील वर्षी होणार्‍या सिंहस्थ कुंभपर्वाच्या सिद्धतेचा ध्वजस्तंभ शिलान्यास पूजन सोहळ्याने शुभारंभ झाला आहे. आगामी कुंभपर्व स्वच्छ, सुरक्षित आणि भव्य स्वरूपात पार पाडण्यासाठी शासन, प्रशासन, साधू-संत, महंत, विविध सामाजिक, धार्मिक संघटना अन् नागरिक यांचा सहभाग आवश्यक आहे. सिंहस्थ कुंभपर्वासाठी देश-विदेशातून येणार्‍या भाविकांचे आदरातिथ्य करण्यासाठी सर्वांनी पुढाकार घ्यावा, असे आवाहन कुंभमेळा मंत्री गिरीश महाजन यांनी केले.

श्री गंगा गोदावरी पंचकोठी (तीर्थ) पुरोहित संघ, नाशिकच्या वतीने कुंभपर्वाच्या पार्श्वभूमीवर श्रीरामाच्या जयघोषात आणि वेदमंत्रोच्चारात सिंहस्थ कुंभपर्व ध्वजस्तंभ शिलान्यास पूजन सोहळा कमला एकादशीच्या पर्वावर पवित्र रामकुंड, नाशिक येथे कुंभपर्व मंत्री श्री. महाजन यांच्या उपस्थितीत झाला. त्या वेळी ते बोलत होते.

याप्रसंगी जगद्गुरु रामानंदाचार्य नरेंद्राचार्य महाराज, महापौर हिमगौरी आडके-आहेर, पोलीस आयुक्त संदीप कर्णिक, कुंभमेळा आयुक्त शेखर सिंह, पुरोहित संघाचे सतीश शुक्ल यांचेसह विविध आखाड्यांचे प्रमुख साधू-संत, महंत उपस्थित होते.

या वेळी मंत्री महाजन म्हणाले,

१. पुढील वर्षी सिंहस्थ कुंभपर्वात मागील कुंभपर्वापेक्षा चार ते पाच पट अधिक, म्हणजेच १२ कोटींपेक्षा अधिक भाविक येतील, अशी अपेक्षा आहे. त्यामुळे कुंभपर्व यशस्वी करण्याचे दायित्व शासन, प्रशासन आणि नागरिक यांचे आहे.

२. गोदावरी नदी स्वच्छ ठेवण्यासाठी विविध संघटना आणि भक्तगण यांनी पुढाकार घेतला असून ही स्वच्छता केवळ एका दिवसापुरती नसून सातत्याने राखली जाईल.

३. देश-विदेशातून येणार्‍या भाविकांचे आदरातिथ्य करण्यासाठी प्रत्येक नाशिककराने स्वयंसेवक बनून पुढाकार घ्यावा.

या वेळी मान्यवरांच्या हस्ते विधीवत् पूजा करुन गंगा गोदावरीचे पूजन करण्यात आले. शंखनाद आणि उपस्थितांच्या टाळ्यांच्या गजरात पूजन समारंभ भक्तीमय वातावरणात पार पडला.

नूतन लेख