उत्पादन आणि मालवाहतूक क्षेत्रांत मोठ्या संधी ! – देवेंद्र फडणवीस, मुख्यमंत्री

नागपूर – सध्याची आंतरराष्ट्रीय परिस्थिती पहाता उत्पादन आणि लॉजिस्टिक्स (मालवाहतूक) क्षेत्रात अनेक मोठ्या संधी निर्माण होणार आहेत; मात्र जागतिक पुरवठा साखळीचा प्रभावी भाग होण्यासाठी जागतिक स्तरावर स्पर्धात्मक होणे आवश्यक असून ‘लॉजिस्टिक्स’वर होणारा खर्च न्यून करणे, हे सध्या उत्पादन क्षेत्रापुढील सर्वांत मोठे आव्हान आहे, असे विधान मुख्यमंत्री देवेंद्र फडणवीस यांनी केले. जिल्ह्यातील गोंडखैरी येथे ‘गोदाम लॉजिस्टिक्स प्रायव्हेट लिमिटेड’च्या वतीने उभारलेल्या ‘गोदाम लॉजिस्टिक्स पार्क’च्या उद्घाटनप्रसंगी ते बोलत होते.

या कार्यक्रमाला केंद्रीय रस्ते परिवहन आणि महामार्ग मंत्री नितीन गडकरी उपस्थित होते. मालवाहतुकीत इलेक्ट्रिक वाहनांचा मोठ्या प्रमाणात वापर झाल्यास इंधन खर्चात मोठी बचत होईल. यामुळे पर्यावरणाचे रक्षण तर होईलच; पण पर्यायाने लॉजिस्टिक्सवर होणारा खर्चही लक्षणीयरित्या अल्प करता येईल, असा विश्वास केंद्रीय मंत्री नितीन गडकरी यांनी व्यक्त केला.