१५ मैदानांमध्ये श्री सिद्धिविनायक मंदिराच्या जवळचे मैदान निश्चित होणे !

श्री राजमातंगीदेवी यज्ञासाठी एकूण १५ मैदाने पहाण्यात आली होती. त्यामध्ये श्री सिद्धिविनायक मंदिराच्या जवळच्या नर्दुला टँक मैदानाची निवड झाली; परंतु मैदानाची अनुमती मिळण्यात अडचणी येत होत्या. हे मैदान अपयशी असल्याचीही अपकीर्ती आहे. येथे जो कुणी उमेदवार सभा घेईल, तो निवडणुकीत पराभूत होतो, असा आतापर्यंतचा अनुभव असल्याचे सांगत स्थानिक नागरिकांनी ‘या मैदानावर महायज्ञ घेऊ नये’, असे सांगितले. त्यातच हे मैदान मुळात खेळाचे आहे. त्यामुळे या मैदानात यज्ञसोहळा घेण्यास तेथील मुले विरोध करत होती. त्यांना यज्ञाचे महत्त्व समजावून सांगितल्यावर त्यांचा विरोध मावळला. श्री सिद्धिविनायक आणि श्री राजमातंगीदेवी यांच्या कृपेमुळेच मैदानात खेळणारी मुले सकारात्मक होऊन त्यांनी पुष्कळ सहकार्य केले.

श्री सिद्धिविनायक आणि श्री राजमातंगीदेवी यांच्या कृपेमुळे सर्व आध्यात्मिक अडथळे दूर झाले. महायज्ञाला अपेक्षेहून अधिक भाविकांची उपस्थितीही लाभली आणि त्यांनी यज्ञाचा दैवी अनुभवही घेतला.

महायज्ञाला श्री सिद्धिविनायकाचा आशीर्वाद आहे, असे जाणवणे ! 

जागा निश्चित झाल्यावर यज्ञकुंडाच्या निर्मितीला प्रारंभ झाला. यज्ञकुंडाच्या निर्मितीचे काम चालू असतांना रात्री यज्ञकुंडाच्या अगदी मध्यभागी उभे राहिल्यावर श्री सिद्धिविनायक मंदिराचा कळस दिसत होता. तो पाहून महायज्ञासाठी एकप्रकारे श्री सिद्धिविनायकाचा आशीर्वाद आहे, असे वाटले.

– श्री. सागर चोपदार, मुंबई