खासगी प्रवासी बस वाहतूकदारांकडून होणारी लूटमार थांबवण्यासाठी राज्य सरकार कायदा करणार !

मुंबई – खासगी प्रवासी वाहतूकदारांना महाराष्ट्र राज्य परिवहन महामंडळाच्या (एस्.टी.च्या) दरापेक्षा ५० टक्के अधिक तिकीट दर घेण्याचा शासननिर्णय आहे. तरीही उन्हाळी सुट्टी, गणेशोत्सव, दिवाळी अशा सणांच्या काळात खासगी बस वाहतूकदार आणि ऑनलाईन प्रवासी खासगी ॲप्स अवाच्या सवा दर आकारून प्रवाशांची लूटमार करत आहेत. या लूटमारीला चाप लावण्यासाठी राज्य सरकार कठोर कायदा करणार असून आगामी अधिवेशनात तो मांडण्याचा आमचा प्रयत्न आहे, असे आश्वासन राज्याचे परिवहनमंत्री श्री. प्रताप सरनाईक यांनी ‘सुराज्य अभियाना’च्या शिष्टमंडळाला दिले. ‘सुराज्य अभियाना’ने गेल्या अनेक वर्षांपासून या संदर्भात केलेल्या सातत्यपूर्ण पाठपुराव्याला मोठे यश मिळाले आहे.

“Surajya Abhiyan is working with a selfless spirit!” – Transport Minister @PratapSarnaik

The Minister praised @SurajyaAbhiyan for its selfless and consistent efforts over the years to resolve issues within the Transport Department.

He further added that the detailed study and… pic.twitter.com/XC9AiYoGqZ

— Sanatan Prabhat (@SanatanPrabhat) May 13, 2026

बैठकीतील अन्य महत्त्वाचे निर्णय आणि मागण्या !

१. प्रवाशांची लूटमार थांबवण्यासाठी शासकीय समिती स्थापन करण्यात येईल. त्यात सुराज्य अभियानाच्या ३ प्रतिनिधींचा समावेश केला जाईल.

२. ‘रेड बस’, ‘मेक माय ट्रिप’ यांसारखी एकूण १८ खासगी प्रवासी ‘ॲप्स’ बंद करण्याची सूचना पुणे येथील प्रादेशिक परिवहन अधिकार्‍यांनी ६ मार्च २०२४ या दिवशी महाराष्ट्र सरकारकडे केली आहे. त्याची कार्यवाही करण्याची मागणी ‘सुराज्य अभियाना’ने केली होती. यावर मंत्र्यांनी सकारात्मक प्रतिसाद दिला.

३. स्थानकांवरील स्वच्छता, पिण्याचे पाणी आणि प्रसाधनगृहांची सुविधा सुधारण्यासाठी लागू करण्यात आलेल्या २ टक्के अधिभाराचा विनियोग केला जाईल.

४. ‘बेस्ट’ आणि ‘एस्.टी.’ बसगाड्यांमधील सूचनांमधील मराठी भाषेच्या व्याकरणाच्या चुका सुधारण्याचे आश्वासनही मंत्र्यांनी दिले.

५. महामंडळाच्या बस आगारातील ७० टक्के दूरभाष सेवा बंद असल्यामुळे प्रवाशांना एस्.टी. सेवेचे अपक्षित लाभ मिळत नाहीत, या समस्येवर परिवहनमंत्री श्री. सरनाईक यांनी मंडळाच्या अधिकार्‍यांना ‘टोल फ्री’ क्रमांक चालू करण्याचा आदेश दिला.

सुराज्य अभियानाचे प्रसिद्धीपत्रक

बैठकीस उपस्थित मान्यवर आणि पदाधिकारी !

मंत्रालयात परिवहन विभागाशी संबंधित विविध विषयांवरील आयोजित बैठकीत  परिवहनमंत्री श्री. प्रताप सरनाईक, परिवहन विभागाचे वरिष्ठ अधिकारी, महाराष्ट्र राज्य परिवहन मार्ग महामंडळाचे अधिकारी, तसेच हिंदु जनजागृती समितिचे महाराष्ट्र राज्य संघटक श्री. सुनील घनवट, ‘सुराज्य अभियाना’चे महाराष्ट्र समन्वयक श्री. अभिषेक मुरुकटे, समन्वयक डॉ. अंजेश कणगलेकर, श्री. सतीश सोनार, श्री. रवी नलावडे आदी पदाधिकारी उपस्थित होते.