Made In Pakistan Fan : कुशीनगर (उत्तरप्रदेश) येथील मदरशात पाकिस्तानी पंखा लावण्यात आल्याचे उघड

कुशीनगर (उत्तरप्रदेश) – येथील एका मदरशामध्ये लावण्यात आलेला पंखा पाकिस्तानी आस्थापनाचा असल्याचे उघड झाल्यानंतर पोलिसांनी अन्वेषण चालू केले आहे. मदरशातील पंखा दुरुस्त करण्यासाठी आलेल्या व्यक्तीला पंख्यावर ‘मेड इन पाकिस्तान’ (पाकिस्ताननिर्मित) असे लिहिल्याचे दिसले. त्याने याचे छायाचित्र काढून सामाजिक माध्यमांतून प्रसारित केल्यावर पोलिसांनी चौकशी चालू केली.

कुशीनगर जिल्ह्यांचे प्रांत अधिकारी जयंत यादव म्हणाले, ‘‘पोलिसांनी मदरशाचा व्यवस्थापक युनुस अन्सारी याची चौकशी केली. त्याने हा पंखा एका स्थानिक रहिवाशाने दान केल्याचे सांगितल्यावर पोलिसांनी त्या रहिवाशाला शोधून काढत त्याचीही चौकशी केली. या रहिवाश्याने सांगितले की, त्याच्या सौदी अरेबियामध्ये स्थायिक असलेल्या मुलाने तो पाठवला होता. वर्ष २०२३ मध्ये सदर पंखा मदरशाला देण्यात आला. यानंतर पोलिसांनी सदर मुलाशीही संपर्क साधला. त्याने सांगितले की, वर्ष २०२० मध्ये सदर पंखा सौदी अरेबियात विकत घेतला होता. त्यानंतर तो त्याच्या वडिलांसाठी भारतात पाठवला. मुलाने पंखा विकत घेतल्याचे देयकही सादर केले. आम्ही या देयकाची तपासणी करत आहोत. तसेच पंखा भारतात आणतांना सीमा शुल्क भरले गेले होते का का? हेही तपासले जात आहे.’’

मदरशामधील शिक्षक ममेराजुद्दीन अन्सारी यांनी सांगितले की, पंख्यावर ‘मेड इन पाकिस्तान’ लिहिले आहे, याची आम्हाला कल्पना नव्हती. मदरसा वर्ष १९९४ पासून लोकवर्गणीतून चालवला जात आहे.