उन्हाळी सुटीत युवक-युवती यांसाठी ‘शौर्य प्रशिक्षण शिबिर’ घेणे महत्त्वाचे ! – सौ. ज्ञानेश्वरी देवकर, उपमहापौर, सोलापूर

सोलापूर – हिंदु जनजागृती समितीच्या ‘हर घर योद्धा’ अभियानांतर्गत जुळे सोलापूर येथील श्री द्वारकाधीश मंदिर परिसरामध्ये २५ एप्रिल ते ४ मे या काळात १० दिवसीय ‘शौर्य प्रशिक्षण शिबिरा’चे आयोजन करण्यात आले होते. या शिबिरात  स्वसंरक्षणाची विविध तंत्रे शिकवण्यात आली. दंडसाखळी आणि लाठीकाठी यांचे प्रशिक्षणही देण्यात आले. या वेळी उपमहापौर सौ. ज्ञानेश्वरी देवकर यांनी उन्हाळ्याच्या सुटीत युवक-युवती यांसाठी अशा उपक्रमांची आवश्यकता असल्याचे सांगून लव्ह जिहादविषयी व्याख्याने आयोजित करण्यासाठी सहकार्य करण्याचे आश्वासन दिले.

भाजप शहर उपाध्यक्ष श्री. संजय साळुंखे यांनी अशा घटनांविषयी साहाय्य करण्याचे आश्वासन दिले, तर हिंदु राष्ट्र समन्वयक समितीचे श्री. चंद्रकांत रमणशेट्टी यांनी अशा उपक्रमांचे ठिकठिकाणी आयोजन करण्याचे आवाहन केले. हिंदु जनजागृती समितीचे श्री. संकेत पिसाळ यांनीही उपस्थितांना मार्गदर्शन केले. समारोपाच्या वेळी शिबिरार्थींनी प्रात्यक्षिके सादर केली. प्रशिक्षण पूर्ण केलेल्या शिबिरार्थींना मान्यवरांच्या हस्ते प्रशस्तीपत्र देण्यात आले. श्री द्वारकाधीश मंदिराचे विश्वस्त श्री. दत्तात्रय पाठक यांनी शिबिराच्या यशस्वी आयोजनासाठी सहकार्य केले.

शिबिरार्थींचे अभिप्राय

१. श्री. वरद महेश कुलकर्णी – शिबिरात सहभागी होऊन पुष्कळ छान आणि समाधानकारक अनुभव आला. ‘हिंदु’ आणि ‘धर्म’ या संकल्पनांची सखोल माहिती मिळाली, तसेच या शिबिरातून संपूर्ण धर्मशिक्षण मिळाले.

२. सौ. गौरी श्रीरंग कुलकर्णी – ‘हर घर योद्धा’ हे नाव वाचताच अत्यंत प्रेरणादायी वाटते. या उपक्रमाचा आपणही एक भाग होण्याची संधी मिळाल्याचा पुष्कळ आनंद आहे. या कार्यासाठी मनःपूर्वक शुभेच्छा !

३. कु. पार्वती सोमनाथ कलशेट्टी – शिबिर पुष्कळ छान वाटले. येथे अनेक नवीन गोष्टी शिकायला मिळाल्या. प्रशिक्षणातील विविध संकल्पना समजल्या, तसेच लाठीकाठी आणि दंडसाखळीचे प्रकारही शिकता आले.

४. कु. सिद्धेश्वरी जोगुरे – मला हे प्रशिक्षण पुष्कळ छान वाटले. मंदिरात दर्शन कसे घ्यायचे ? नमस्कार कसा करावा ? अशा कृती आम्हाला यातून शिकायला मिळाल्या.

५. श्री. प्रदीप उळागड्डे, शिक्षक – मी माझ्या दोन्ही मुलांना या शिबिरात सहभागी होण्यासाठी पाठवले होते. कधीही हात न उचलणारी माझी मुलगी आज कराटेचे प्रहार करतांना पाहून मला पुष्कळ आनंद झाला. या शिबिरामुळे मुलांमध्ये सतर्कता आणि शौर्य वाढले आहे. मी हिंदु जनजागृती समितीचे मनःपूर्वक आभार मानतो.