नाशिक येथे श्री काळाराम मंदिरात धर्मध्वज उभारणी सोहळा पार पडला !

नाशिक – आगामी सिंहस्थ कुंभपर्व २०२७-२८ च्या पार्श्वभूमीवर पंचवटीतील ऐतिहासिक श्री काळाराम मंदिरात धर्मध्वज उभारणी सोहळा पार पडला. अयोध्येच्या धर्तीवर उभारलेल्या २१ फूट उंच पंचधातूच्या धर्मध्वज स्तंभावर भगवा धर्मध्वज विधीवत् पूजन करून माजी राष्ट्रपती रामनाथ कोविंद आणि मुख्यमंत्री देवेंद्र फडणवीस यांच्या हस्ते फडकवण्यात आला. या वेळी अयोध्या न्यासाचे कोशाध्यक्ष प.पू. स्वामी गोविंददेव गिरि यांचीही वंदनीय उपस्थिती लाभली.

पंचधातूपासून सिद्ध केलेल्या धर्मध्वजस्तंभावर ११ बाय ५ फूट आकाराचा भगवा ध्वज आहे. त्याच्यावर हनुमंतरायांची प्रतिमा, तसेच सूर्यदेवतेचे ‘ॐ’ चिन्ह अंकित करण्यात आले आहे. मंदिर परिसरात आकर्षक विद्युत रोषणाई, फुलांची सजावट आणि पारंपरिक सजावट करण्यात आली होती. या सोहळ्यामुळे सिंहस्थ कुंभपर्वाच्या सिद्धतेला धार्मिक प्रारंभ झाल्याचे या वेळी सांगण्यात आले. या वेळी विविध मंत्री, तसेच मान्यवर यांच्यासह वैष्णव आणि शैव आखाड्यांचे महंत, साधू आदी उपस्थित होते.