कोल्हापूर महानगरपालिकेचा ‘आय.आय.टी. मन्डी’ समवेत सामंजस्य करार !

देशातील विविध ‘स्मार्ट सिटी’ प्रकल्पांमध्ये ‘आय.आय.टी.’ संस्थांचे तांत्रिक सहकार्य घेतले जाते. शहरी नियोजन, कृत्रिम बुद्धीमत्ता, संगणकीय ज्ञानजाल, पर्यावरण व्यवस्थापन या क्षेत्रांतील आयआयटीचा अनुभव कोल्हापूरच्या विकासासाठी अत्यंत उपयुक्त ठरणार आहे. या पार्श्वभूमीवर ‘आय.आय.टी. मन्डी’ समवेतचा हा करार शहराच्या प्रगतीसाठी ‘स्मार्ट सिटी’कडे वाटचाल करणारा ठरेल.

‘आय.आय.टी. मन्डी’ने यापूर्वी जिल्हाधिकारी कार्यालया समवेतच्या सहकार्य अंतर्गत नवरात्र उत्सवात अंबाबाई मंदिर परिसरात विशेष संगणकीय प्रणाली यशस्वीपणे राबवली होती, तसेच जोतिबा यात्रेतही ही प्रणाली प्रभावीपणे वापरण्यात आली होती. यामुळे गर्दी व्यवस्थापन अधिक सुरक्षित आणि सुकर झाले होते. या सहकार्यामुळे शहरातील आपत्कालीन प्रतिसाद व्यवस्था, वाहतूक व्यवस्थापन, शहर नियोजन करतांना साहाय्य होणार आहे आणि यामुळे शहराच्या विकासाला बळ मिळणार आहे.