सनातन प्रभात > Post Type > बातम्या > आंतरराष्ट्रीय बातम्या > Francois Gautier Facebook Account : प्रसिद्ध पत्रकार फ्रान्सुआ गोतिए यांचे ‘मेटा’ने फेसबुक खाते हटवले !

Francois Gautier Facebook Account : प्रसिद्ध पत्रकार फ्रान्सुआ गोतिए यांचे ‘मेटा’ने फेसबुक खाते हटवले !

बांगलादेशातील हिंदूंवरील अत्याचारांचे व्हिडिओ प्रसारित केल्यामुळे कारवाई केल्याचा गोतिए यांना संशय !

वर्तुळात फ्रान्सुआ गोतिए

नवी देहली – प्रसिद्ध लेखक आणि पत्रकार फ्रान्सुआ गोतिए यांनी त्यांचे फेसबुक खाते कायमचे हटवण्यात (डिलीट) आल्याचे म्हटले आहे. त्यांनी ‘एक्स’वर याविषयी माहिती दिली आहे. गोतिए यांच्या मते, त्यांनी बांगलादेशातील हिंदूंवरील हिंसेच्या संदर्भातील व्हिडिओ प्रसारित केल्यानंतर त्यांच्या खात्यावर कारवाई करण्यात आली. या घटनेमुळे अभिव्यक्तीस्वातंत्र्याच्या सूत्रावर पुन्हा प्रश्नचिन्ह उपस्थित झाले आहे.

गोतिए यांनी ‘एक्स’वर म्हटले आहे की, त्यांचे अनुमाने २ लाख मित्र असलेले फेसबुक खाते अचानक हटवण्यात आले. तसेच त्यांनी नमूद केले की, त्यांचे इन्स्टाग्राम खाते यापूर्वी २ वेळा हटवण्यात आले होते. या संदर्भात गोतिए यांनी सामाजिक माध्यमांच्या नियंत्रणावर प्रश्न उपस्थित केले आहेत.

यापूर्वी ‘यू ट्यूब चॅनल’ आणि ‘ट्विटर’ खाते करण्यात आले होते बंद !

गोतिए यांच्या सामाजिक माध्यम खात्यांवर यापूर्वीही कारवाई झाल्याच्या घटना आहेत. वर्ष २०२१ मध्ये त्यांचे ‘ट्विटर’ खाते निलंबित झाले होते, तर वर्ष २०२४ मध्ये त्यांचे यू ट्यूब चॅनल हटवण्यात आले होते.

‘मेटा’कडून प्रतिक्रिया नाही

फेसबुकची मालकी असणार्‍या ‘मेटा’ आस्थापनाकडून या प्रकरणावर कोणतीही अधिकृत प्रतिक्रिया देण्यात आलेली नाही. सामान्यतः समुदाय नियमांचे उल्लंघन, संवेदनशील अथवा हिंसक सामुग्री यांसारख्या कारणांमुळे खाती हटवली जातात.

संपादकीय भूमिका

अभिव्यक्तीस्वातंत्र्याचा ढोल बडवणार्‍या ‘मेटा’सारख्या सामाजिक माध्यमांचे हिंदुद्वेषी स्वरूप यावरून दिसून येते !  

नूतन लेख