Motihari Madrasa Sealed : मोतिहारी (बिहार) – मदरशात पिस्तूल सापडल्यानंतर मदरशाला टाळे ठोकले

मोतिहारी (बिहार) – राज्यातील पूर्व चंपारण जिल्हा जिहादी कारवायांसाठी पुन्हा एकदा चर्चेत आला आहे. जिल्ह्यातील चकिया परिसरात असलेल्या गवंदरा गावातील मदरशावर पोलिसांनी मोठी कारवाई करत धाड घातली. यात एक अत्याधुनिक पिस्तूल जप्त करून ३ जणांना अटक करण्यात आली. ही माहिती स्वत: मोतिहारीचे पोलीस अधीक्षक स्वर्ण प्रभात यांनी प्रसारमाध्यमांना दिली. मदरशाला तात्काळ टाळे ठोकण्यात आले आहे. एखादी मोठी घटना घडवण्याच्या उद्देशाने शस्त्रसाठा केला जात असल्याची पोलिसांना शंका आहे.

याच मदरशातून अडीच वर्षांपूर्वी बंदी घालण्यात आलेल्या ‘पॉप्युलर फ्रंट ऑफ इंडिया’चा प्रमुख सदस्य सुल्तान उपाख्य उस्मान उपाख्य याकूब याला पोलिसांनी अटक केली होती. पोलीस अधीक्षक स्वर्ण प्रभात यांनी सांगितले की, मदरशात शस्त्र असल्याची गुप्त माहिती मिळाल्यानंतर कारवाई करण्यात आली.