अशोक खरात याच्या पोलीस कोठडीत १ एप्रिलपर्यंत वाढ !

नाशिक – भोंदूबाबा अशोक खरात याच्या पोलीस कोठडीत १ एप्रिलपर्यंत वाढ करण्याचा महत्त्वपूर्ण निर्णय नाशिक जिल्हा न्यायालयाने दिला आहे. महिलांवरील अत्याचार आणि आर्थिक फसवणुकीचे गंभीर गुन्हे नोंदवलेल्या खरातचे अन्वेषण करण्यासाठी विशेष अन्वेषण पथकाला अधिक कालावधीची आवश्यकता असल्याचे न्यायालयाने मान्य केले.

रुपाली चाकणकर यांना नोटीस !

पुणे – भोंदूबाबा अशोक खरात यांच्या वादग्रस्त प्रकरणामुळे ‘शिवनिका ट्रस्ट’चे आजी-माजी सदस्य आणि विश्वस्त यांची चौकशी ‘विशेष अन्वेषण पथका’द्वारे करण्यात येत आहे. त्यातून राज्य महिला आयोगाच्या माजी अध्यक्षा रूपाली चाकणकर यांनाही चौकशीची नोटीस देण्यात आली. रूपाली चाकणकर यांनी राज्य महिला आयोगाचे अध्यक्षपद आणि राष्ट्रवादी काँग्रेस पक्षाचे महिला प्रदेशाध्यक्षपद यांचे त्यागपत्र दिलेले आहे.

‘कोणत्याही अन्वेषणामध्ये नाव समोर आल्यानंतर पोलीस त्यांची बाजू पडताळून पहाण्यासाठी नोटीस पाठवतात. त्यानुसार चाकणकर यांना नोटीस दिली असेल. त्यांची साक्ष नोंदवून घेतली जाईल. अन्वेषणातून जे समोर येईल, त्यानुसार पुढील कारवाई केली जात आहे’, असे महसूलमंत्री चंद्रकांत बावनकुळे यांनी प्रसारमाध्यमांसमोर सांगितले.

आयोगाकडील तक्रारींचे पुनर्अन्वेषण करावे ! – दमानिया

मुंबई – रूपाली चाकणकर या राज्य महिला आयोगाच्या अध्यक्षा असतांना त्यांच्याकडे आलेल्या अशोक खरात याच्याविषयीच्या तक्रारी दडपल्या गेल्याची शक्यता आहे. त्यामुळे अशोक खरात याच्याविषयी राज्य महिला आयोगाकडे आलेल्या तक्रारींचे पुनर्अन्वेषण करण्यात यावे, अशी मागणी सामाजिक कार्यकर्त्या अंजली दमानिया यांनी सरकारकडे केली आहे. अशोक खरात याने महिलांचे लैंगिक शोषण केल्याचे प्रकरण उघड झाल्यावर रूपाली चाकणकर यांनी राज्य महिला आयोगाच्या अध्यक्षपदाचे त्यागपत्र दिले आहे.