सातार्‍यातील गोडोली परिसरात मद्य विक्री दुकानाला अनुमती देऊ नये !

नागरिकांची मागणी

सातारा, २५ मार्च (वार्ता.) – येथील गोडोली तलाव परिसरामध्ये स्वराज्याचे दुसरे छत्रपती श्रीमंत संभाजीराजे भोसले यांचे स्मारक साकारण्यात येत आहे. स्मारकाचे काम पूर्णत्वाच्या वाटेवर आहे; मात्र स्मारक परिसरामध्ये असलेल्या एका हॉटेल व्यावसायिकाकडून मद्यविक्री दुकानाची अनुमती मिळण्यासाठी अर्ज करण्यात आला आहे. याविषयी राज्य उत्पादन शुल्क अधिक्षक कार्यालयाशी पत्रव्यवहार झाला असून जिल्हाधिकार्‍यांकडे मान्यतेसाठी हा अर्ज येणार आहे. त्यांनीही या अर्जास मान्यता देऊ नये, अशी मागणी स्थानिक नागरिकांनी जिल्हाधिकारी संतोष पाटील यांच्याकडे निवेदनाद्वारे केली आहे. (नागरिकांना मागणी का करावी लागते ? प्रशासनालाच ते लक्षात आले पाहिजे. – संपादक)

या निवेदनामध्ये म्हटले आहे की, गोडोली येथील मद्यविक्री दुकानाच्या विरोधात राज्य उत्पादन शुल्क विभागाकडे आम्ही तक्रारी केल्या आहेत. याविषयी कार्यालयाने आमचे जबाब नोंदवून घेतले आहेत. हा अर्ज मान्यतेसाठी जिल्हाधिकार्‍यांकडे येणार असून आमच्या तक्रारी, स्थानिक नागरिक यांचा, तसेच ज्या इमारतीमध्ये मद्यविक्रीचे दुकान थाटण्यात येणार आहे, तेथील माता-भगिनी, आबालवृद्ध आणि इमारतीतील सभासदांच्या हिताचा विचार व्हावा. जिल्हाधिकार्‍यांनी या मद्यविक्री दुकानास मान्यता दिल्यास आम्हालाही लोकहितार्थ न्यायालयीन लढाई लढावी लागेल.