अभ्यासू वृत्ती आणि प्रेमभाव असलेल्या रामनाथी (गोवा) येथील सनातनच्या आश्रमातील श्रीमती क्षमा शशिकांत राणे !

१. स्वतःचे घर सेवाकेंद्रासाठी देणे

‘वर्ष १९९९ आम्ही (मी आणि माझे यजमान सद्गुरु राजेंद्र शिंदे) ठाणे येथे प्रथमच शशिकांत राणे (आताचे कै. शशिकांत राणे, आध्यात्मिक पातळी ६१ टक्के) आणि श्रीमती क्षमा राणे (आध्यात्मिक पातळी ६१ टक्के, वय ७५ वर्षे) यांना भेटलो. त्याच वर्षी ‘साधकांना साधना आणि सेवा करता येण्यासाठी ठाणे येथील स्वतःचे घर सेवाकेंद्रासाठी देऊन ते दोघे गोवा येथील आश्रमात जात आहेत’, हे आम्हाला कळले. तेव्हा त्याविषयी आम्हाला आश्चर्य वाटून आनंद झाला. त्यानंतर त्यांचे ठाणे येथील घर सनातनचे सेवाकेंद्र झाले.

२. प्रेमभाव

काकू ठाणे सेवाकेंद्रात असतांना वेळात वेळ काढून आवर्जून काहीतरी गोड पदार्थ बनवून आम्हा साधकांना देत असत. ‘राणेकाका-काकू सेवाकेंद्रात आल्यावर घरातील मोठ्या व्यक्ती आल्या आहेत’, असे मला वाटत असे.

३. राणेकाकूंनी स्वतःला शिकायला मिळालेल्या गोष्टी इतरांना सांगणे

अ. काकू स्वयंपाकघरात सेवा करत असतांना त्यांच्याकडून मला स्वयंपाकातील नवीन गोष्टी शिकायला मिळत असत.

आ. वर्ष २००५ ते २००६ या कालावधीत मी ठाणे सेवाकेंद्रात रहात होते. त्या वेळी कधीतरी राणेकाका आणि काकू रामनाथी (गोवा) येथील सनातनच्या आश्रमातून ठाणे सेवाकेंद्रात येत असत. तेव्हा ते त्यांना रामनाथी आश्रमात शिकायला मिळालेली सूत्रे आम्हा सर्व साधकांना सांगत असत.

इ. काही वेळा मी रामनाथी (गोवा) येथील सनातनच्या आश्रमातील बेकरीत सेवेला जात असे. त्या वेळी काकूंकडून मला विविध प्रकारची बिस्किटे, नानकटाई या पदार्थांविषयी सखोल आणि अभ्यासपूर्ण माहिती मिळत असे. काकू आम्हाला सर्व साहित्य काटकसरीने वापरण्याविषयी सांगत असत.