३ अल्पवयीन मुलांसह ३५ जणांची साक्ष !

पुणे – नसरापूर येथील बालिकेवर अत्याचार केल्याच्या प्रकरणाची सुनावणी पुणे येथे विशेष न्यायालयात प्रतिदिन करण्यात येत आहे. आतापर्यंत ३ अल्पवयीन मुलांसह एकूण ३५ साक्षीदारांची साक्ष नोंदवली आहे. सरकार पक्षाने प्रत्यक्षदर्शी साक्षीदार, तांत्रिक पुरावे, वैद्यकीय अहवाल आणि डी.एन्.ए. (गुणसूत्र) विश्लेषणासह आरोपी भीमराव कांबळे याच्या विरोधात भक्कम पुरावे न्यायालयात सादर केले. या ३ अल्पवयीन मुलांनी निर्भीडपणे न्यायालयात साक्ष दिली. आरोपी बालिकेला घटनास्थळाकडे घेऊन जात असल्याचे त्यांनी पाहिले, तसेच बंद शेडमध्ये पलंगावर तिच्यासोबत बसलेला असल्याचे पाहिल्याचे सांगितले. बालिकेला साहाय्य करण्याच्या उद्देशाने त्यांनी शेडवर दगड मारल्याचेही साक्षीमध्ये नमूद केले आहे.