Indian Cow Dung Export : भारतीय गायीच्या शेणाची निर्यात सहस्रो कोटी रुपयांच्या घरात जाणार !

नवी देहली – भारतामधील देशी गायीच्या शेणाला जागतिक बाजारपेठेत मोठी मागणी आहे. या शेणाचा अनेक वर्षे केवळ ग्रामीण भागांत पारंपरिक गोष्टींसाठी वापर होत असे. तथापि आता नैसर्गिक शेती, जैविक खत आणि पर्यावरणपूरक उत्पादने म्हणून याची मागणी वाढली आहे. संयुक्त अरब अमिरात, सौदी अरेबिया, कुवैत यांसारख्या शुष्क हवामान असलेल्या देशांमध्ये खजुराच्या शेतीसाठी हे शेण अत्यंत उपयुक्त आहे. याखेरीज ऑस्ट्रेलिया, अमेरिका, चीन, मालदीव आणि सिंगापूर यांसारख्या देशांमध्येही शेणाची मागणी वाढत आहे.

जागतिक स्तरावर शेण आणि त्यापासून बनवलेले जैविक खत, ‘कंपोस्ट’ (सेंद्रिय पदार्थापासून बनवलेले) खत यांसारखी उत्पादने जागतिक बाजारपेठेत सहस्रो कोटी रुपयांना विकली जात आहेत. प्रति किलो ताज्या शेणाला बाजारात मोठी किंमत आहे. या शेणाचा व्यापार देशासाठी एक महत्त्वाचा निर्यात स्रोत बनत आहे. सेंद्रिय खतांमध्ये गायीच्या शेणातील नाइट्रोजन, फॉस्फरस आणि पोटॅशियम यांसारखे पोषक घटक लाभदायी ठरतात. भारतात मोठ्या प्रमाणात पशुधन असल्यामुळे प्रतिदिन शेणाची निर्मिती अत्यधिक आहे. त्यामुळे निर्यातीसाठी शेणाची पुरेशी उपलब्धताही आहे.