US-Bangladesh Trade Deal : अमेरिका-बांगलादेश यांच्यात दक्षिण आशियातील पहिला परस्पर व्यापार करार !

(परस्पर व्यापार करार म्हणजे व्यापारात सहभागी दोन्ही देशांना परस्परपूरक आणि नफा देणारा व्यापार करार. यांतर्गत उभय देश एकमेकांसाठी आयात कर अल्प करतात.)

वॉशिंग्टन (अमेरिका) – अमेरिका आणि बांगलादेश यांनी परस्पर व्यापार करारावर स्वाक्षरी केली आहे. अमेरिकेने बांगलादेशी निर्यातीवरील परस्पर कर २० टक्क्यांवरून १९ टक्क्यांपर्यंत अल्प केला. बांगलादेशाच्या अंतरिम सरकारचे मुख्य सल्लागार महंमद युनूस यांनी एका निवेदनात म्हटले की, अमेरिकेने ‘अमेरिकेचा कापूस आणि मानवनिर्मित धागे यांचा वापर करणार्‍या बांगलादेशातील वस्त्रोद्योगांसाठी एक यंत्रणा स्थापित करू’, अशी वचनबद्धता दर्शवली आहे. यामुळे अमेरिकी बाजारात आमच्या उत्पादनांवर शून्य कर लागू होईल.

दुसरीकडे ‘व्हाईट हाऊस’नुसार बांगलादेश अमेरिकी निर्यात, विशेषतः सोयाबीन, मका, नागरी विमाने आणि वाहनांसाठी त्यांची बाजारपेठ खुली करण्यात सहकार्य करेल.

अमेरिकेचे राजदूत जेमिसन ग्रीर म्हणाले की, बांगलादेशासमवेत पारस्परपूरक व्यापारावरील करारावर स्वाक्षरी करणे, हे दक्षिण आशियातील पहिले उदाहरण आहे.