Congress MPs Suspended : संसदीय अधिवेशनात अध्यक्षांवर कागद भिरकावल्यावरून ८ खासदारांचे निलंबन

काँग्रेसचे ७, तर मार्क्सवादी कम्युनिस्ट पक्षाच्या एका खासदाराचा समावेश

नवी देहली – संसदेच्या अर्थसंकल्पीय अधिवेशनाच्या पाचव्या दिवशी लोकसभेचे कामकाज सकाळी ११ वाजता चालू झाले; परंतु केवळ ८ मिनिटेच चालू शकले. विरोधकांनी पंतप्रधान नरेंद्र मोदी यांच्या विरोधात घोषणा दिल्या. सभागृहाचे कामकाज स्थगित करण्याची प्रक्रिया अनेक वेळा झाली. संसदेत चर्चेच्या वेळी काही खासदारांनी लोकसभेच्या अध्यक्षांच्या दिशेने कागद भिरकावले. या अनुशासनहीनतेमुळे काँग्रेसचे ७, तर माक्सर्वादी कम्युनिस्ट पक्षाचा १ अशा ८ खासदारांना संपूर्ण अर्थसंकल्पीय अधिवेशनातून निलंबित करण्यात आले.

लोकसभेचे अध्यक्ष ओम बिर्ला म्हणाले की, घोषणा देणे चुकीचे आणि नियमांविरुद्ध आहे. तरीही विरोधकांनी गदारोळ चालूच ठेवला होता. या वेळी कारवाई करत कागद भिरकावणार्‍या ८ खासदारांना निलंबित करण्यात आले. यात मणिकम टॅगोर, गुरजीत औजला, राजा वडिंग, हिबी ईडन, किरण रेड्डी, प्रशांत पोडोले, वेंकट रमन आणि डीन कुरियोकोज यांचा समावेश आहे. निलंबित केल्यावरून या खासदारांनी संसद परिसरात विरोध प्रदर्शन केले.

सभागृहाचे कामकाज कोणत्याही व्यत्ययाविना चालावे, यासाठी अध्यक्ष ओम बिर्ला यांनी काँग्रेस आणि भाजप खासदारांसमवेत गदारोळावरून बैठक घेतली. सभागृहाबाहेर विरोधी खासदारांनी अमेरिका-भारत व्यापार करारावरूनही घोषणा दिल्या.