पन्हाळागडावरील ‘पाराशर तीर्था’तील अनधिकृत बांधकाम त्वरित हटवा !

कोल्हापूर – ऐतिहासिक वारसा असलेल्या पन्हाळागडावरील पाराशर तीर्थ (सादोबा तलाव) परिसरात ३ मजली अनधिकृत बांधकाम आणि इतर धार्मिक अतिक्रमणे झाली आहेत. ही अतिक्रमणे तात्काळ भुईसपाट करावीत, अन्यथा ‘गड स्वच्छता मोहीम’ राबवू, या मागणीचे निवेदन कोल्हापूर जिल्ह्यातील विविध हिंदुत्वनिष्ठ संघटनांनी जिल्हाधिकारी अमोल येडगे यांना २७ जानेवारी या दिवशी दिले.

या प्रसंगी हिंदु एकता आंदोलनाचे जिल्हाध्यक्ष श्री. दीपक देसाई, शहराध्यक्ष श्री. गजानन तोडकर, विश्व हिंदु परिषदेचे जिल्हाध्यक्ष श्री. कुंदन पाटील, विलास मोहिते, श्री शिवप्रतिष्ठान हिंदुस्थानचे शहर कार्यवाह श्री. आशिष लोखंडे, सर्वश्री संदीप सासने, हिंदुराव शेळके, प्रतीक डिग्गे, नीलेश शिंदे, श्रीकांत कदम, सचिन भोसले, प्रदीप मोहिते, नागेश हुगार, बाबू साखळकर, अंजली जाधव, पूजा शिंदे, जयवंत खतकर, कैलास दीक्षित आणि शिवप्रेमी उपस्थित होते.

विश्व हिंदु परिषद आणि हिंदु एकता आंदोलन गेल्या २ वर्षांपासून या विषयावर पाठपुरावा करत आहेत. मुख्य कार्यकारी अधिकार्‍यांनी केलेल्या चौकशीत सदर जागा सरकारी असून बांधकामासाठी कोणतीही अनुमती घेतली नसल्याचे समोर आले आहे. असे असतांनाही वर्षभर कोणतीही कारवाई न होणे, ही प्रशासनाची मोठी त्रुटी असून संबंधित अधिकार्‍यांचे निलंबन करावे.