Madras High Court : मंदिरात पहिला सन्मान केवळ देवाचाच !

चेन्नई (तमिळनाडू) – मंदिरांमध्ये कोणताही मानवा सन्मान देतांना प्रथम मान हा केवळ देवतेलाच द्यायचा असतो. कोणत्याही व्यक्तीने विशेष मान हा आपला अधिकार असल्याप्रमाणे मागू नये आणि तसा दावा ग्राह्य धरला जाऊ शकत नाही, असे मद्रास उच्च न्यायालयाने नमूद केले. श्रीरंगम् श्रीमठ अंडावन आश्रमाने प्रविष्ट (दाखल) केलेल्या याचिकेवर न्यायालयाने वरील निर्णय दिला. कांचीपूरम् येथील देवराज स्वामी मंदिरात आश्रमप्रमुखांना वर्ष १९९२ पासून दिला जाणारा ‘पंचमुद्रा’ हा विशेष मान वर्ष २०२३ मध्ये थांबवण्यात आला होता. तो पुन्हा प्रारंभ करण्यात यावा, अशी मागणी याचिकेत करण्यात आली होती.

१. सुनावणीच्या वेळी हिंदु धार्मिक आणि धर्मादाय निधी विभागाच्या वतीने मांडण्यात आले की, विशेष सन्मान केवळ ५ मठप्रमुखांना दिला जातो. त्यात कांची कामकोटी पीठ, श्री अहोबिला मठ, नांगुनेरी श्री वनमालै मठ, मैसूर श्री परकाला जिअर मठ आणि उडुपी श्री व्यासराय मठ यांचा समावेश आहे.

२. या युक्तीवादाची नोंद घेत न्यायालयाने स्पष्ट केले की, मंदिरातील प्रथम सन्मान हा देवतेलाच द्यायचा असतो. ‘मठप्रमुखांना दिले जाणारे विशेष सन्मान हे अधिकार म्हणून दावा करण्यासारखे नाहीत’, असे सांगत आश्रमाची याचिका न्यायालयाने फेटाळून लावली. तसेच तमिळनाडू हिंदु धार्मिक आणि धर्मादाय निधी अधिनियमानुसार मठप्रमुखांना दिल्या जाणार्‍या मानाविषयी निर्णय घेण्याचा अधिकार केवळ संबंधित अधिकार्‍यांकडेच असल्याचे न्यायालयाने नमूद केले. श्रीरंगम् श्रीमठ अंडावन आश्रम प्रशासनाने आवश्यक असल्यास संबंधित विभागाकडे प्रतिनिधित्व करून उपाययोजना मागू शकतात, असेही न्यायालयाने स्पष्ट केले