विधीमंडळ अधिवेशनाच्या निमित्ताने विविध आमदार आणि मंत्री यांना निवेदने !

हिंदु जनजागृती समितीचे महाराष्ट्र आणि छत्तीसगड संघटक सुनील घनवट यांच्या विविध लोकप्रतिनिधींशी भेटी !

(‘अँटी लँड ग्रॅबिंग’ कायदा म्हणजे मंदिरांच्या भूमी अनधिकृतरित्या कह्यात घेण्याच्या विरोधातील कायदा)

१. नागपूर येथील सावनेर क्षेत्राचे भाजपचे आमदार आशिष देशमुख यांना ‘अँटी लँड ग्रॅबिंग’ (भूमी अधिग्रहण) कायद्याच्या विरोधात हिंदु जनजागृती समितीचे श्री. अतुल अर्न्वेला यांनी निवेदन दिले. त्या वेळी ‘मी माननीय मुख्यमंत्र्यांना पत्र लिहून हा विषय देईन’, असे आश्वासन आमदार आशिष देशमुख यांनी दिले.

२. गृहराज्यमंत्री योगेश कदम यांना मुंबईत होणारा ‘सनबर्न फेस्टिव्हल’ रहित करण्याविषयीचे निवेदन देण्यात आले. या वेळी ‘हे युवा पिढीसाठी गंभीर आहे. फेस्टिव्हल रहित करण्याविषयी पोलीस आयुक्तांसमवेत बोलतो’, असे आश्वासन त्यांनी दिले.

३. भाजपचे किनवट येथील आमदार भीमराव केराम, यवतमाळ येथील आमदार राजू तोडसम, शिरपूर येथील आमदार काशीराम पवार, नाशिक येथील आमदार दिलीप बोरसे, वर्धा येथील आमदार केचे यांची सुनील घनवट यांनी भेट घेतली. या वेळी त्यांनी आमदार काशीराम पवार यांना ‘लव्ह जिहाद आणि धर्मांतर’ यांच्या विरोधातील कायद्याच्या संदर्भातील निवेदन दिले. या वेळी त्यांनी ‘विधीमंडळात याविषयी औचित्याचे सूत्र घेऊ’, असे आश्वासन दिले.

४. शिवसेनेचे मुख्य प्रतोद रमेश बोरनार यांना सुनील घनवट यांनी ‘अँटी लँड ग्रॅबिंग’ कायद्याच्या संदर्भात, ‘सनबर्न फेस्टिव्हल’ रहित करण्याच्या संदर्भात आणि लव्ह जिहाद विरोधी कायदा आणण्याच्या संदर्भात निवेदन दिले.

५. भंडारा-गोंदिया येथील भाजपचे आमदार परिणय फुके यांना ‘अँटी लँड ग्रॅबिंग’ कायद्याच्या संदर्भातील निवेदन सुनील घनवट यांनी दिले.

सुनील घनवट यांनी लोकप्रतिनिधींना ‘सनातन पंचांग २०२६’ भेट दिले ! या वेळी भाजपचे आमदार मोहन मते यांना समितीचे अतुल अर्न्वेला यांनी ‘सनातन पंचांग २०२६’ भेट म्हणून दिले. आमदार सुरेश धस यांना अँटी लँड ग्रॅबिंग’ आणि  मुद्रांक शुल्क कायद्याच्या संदर्भात निवेदन दिले.