महाराष्ट्रात ४ वर्षांत ४३ सहस्र अर्भकांचा मृत्यू !

माहिती अधिकारातून माहिती उघड !

नागपूर – महाराष्ट्रामध्ये एप्रिल २०२२ ते २०२५ या ४ वर्षांच्या कालावधीत ४३ सहस्र ६६२ अर्भक (० ते १ वर्ष) आणि ७ सहस्र ३८५ बालकांचा (१ ते ५ वर्ष) मृत्यू झाल्याचे धक्कादायक वास्तव माहिती अधिकारातून समोर आले आहे. माहिती अधिकार कार्यकर्ते अभय कोलारकर यांनी ही आकडेवारी उघड केली आहे.

१. राज्यातील माता मृत्यूची आकडेवारीही चिंताजनक आहे. १ जानेवारी ते ३१ मार्च २०२३ या ३ महिन्यांत २३२ मातांचा मृत्यू झाला, तर २०२३ ते २०२४ या एका वर्षात ही संख्या १ सहस्र १३१ होती.

२. वर्ष २०२४ ते २०२५ मध्ये १ सहस्र १०६ आणि जानेवारी ते ३१ ऑक्टोबर २०२५ या काळात ५९९ माता मृत्यूंची नोंद झाली आहे. एकूण माता मृत्यूंच्या संख्येतही वाढ दिसून येते.

३. वर्ष २०२३ ते २०२४ मध्ये ११ सहस्र ७२६, वर्ष २०२४ ते २०२५ मध्ये १२ सहस्र ६८५ आणि एप्रिल २०२५ ते ३० सप्टेंबर २०२५ या कालावधीत ६ सहस्र ४७१ माता मृत्यू झाले.

४. याच ४ वर्षांच्या कालावधीत राज्यात ११ सहस्र ८४० बालकांना हृदयदोष असल्याचे निदान झाले. त्यांपैकी ११ सहस्र ३३६ बालकांवर यशस्वी शस्त्रक्रिया करण्यात आली.

५. हृदयदोष असलेल्या बालकांच्या आकडेवारीत एप्रिल २०२२ ते मार्च २०२३ मध्ये ४ सहस्र १६१, एप्रिल २०२३ ते मार्च २०२४ मध्ये ३ सहस्र ४३५, एप्रिल २०२४ ते मार्च २०२५ मध्ये ३ सहस्र २२६ आणि एप्रिल २०२५ ते सप्टेंबर २०२५ मध्ये १ सहस्र १८ बालकांचा समावेश आहे.