नवी देहली येथील ‘सनातन राष्ट्र शंखनाद महोत्सव’ राष्ट्राच्या उन्नतीसाठी ठोस दिशा देईल !- ब्रिगेडियर संजय अगरवाल (निवृत्त), ग्रेटर नोएडा

नवी देहली – येथे १३ आणि १४ डिसेंबर या दिवशी होणार्‍या ‘सनातन राष्ट्र शंखनाद महोत्सवा’मध्ये देशभरातील नामांकित विचारवंत, तज्ञ अन् राष्ट्रनिष्ठ व्यक्ती एकत्र येऊन राष्ट्रहिताच्या महत्त्वाच्या विषयांवर चिंतन-मनन करणार आहेत. त्यामुळे हा महोत्सव राष्ट्राच्या उन्नतीसाठी ठोस दिशा, विचार आणि उपाययोजना यांसाठी व्यासपीठ ठरेल, असा विश्वास ब्रिगेडियर संजय अगरवाल (निवृत्त) यांनी व्यक्त केला.

या महोत्सवाविषयी ब्रिगेडियर संजय अगरवाल (निवृत्त) म्हणाले, ‘‘सनातन राष्ट्र शंखनाद महोत्सव हा राष्ट्रनिर्मितीच्या संकल्पनेला समर्पित आणि भारतभूमीच्या दृढ पायाभरणीला बळ देणारा एक ऐतिहासिक सोहळा आहे. छत्रपती शिवाजी महाराज यांची भवानी तलवार, तसेच त्यांच्या कालखंडातील दुर्मिळ विविध ऐतिहासिक शस्त्रांचे प्रदर्शन हे या महोत्सवाचे वैशिष्ट्य आहे. हे प्रदर्शन भारतीय शौर्यपरंपरेचे जिवंत प्रतीक ठरेल.’’

सनातन संस्थेच्या वतीने १३ आणि १४ डिसेंबर या दिवशी ‘भारत मंडपम्’ येथे ‘सनातन राष्ट्र शंखनाद महोत्सवा’चे आयोजन करण्यात आले आहे. राष्ट्र आणि धर्म कार्य कर्तव्यभावनेने करणारे विविध क्षेत्रांतील महनीय व्यक्ती या महोत्सवाला उपस्थित रहाणार आहेत.