१३ टक्के वेतनवाढीच्या आश्वासनानंतर ‘शनैश्वर देवस्थान’मधील कर्मचार्‍यांचे उपोषण मागे !

कर्मचार्‍यांच्या ९० टक्के मागण्या मान्य

शनिशिंगणापूर – १ ऑगस्ट २०२४ या दिवशी लागू केलेल्या वेतनश्रेणीत असलेल्या त्रुटी, महागाई भत्ता, कालबद्ध पदोन्नती आदींसह ८ मागण्या घेऊन शनिशिंगणापूर येथील ‘शनैश्वर देवस्थाना’चे कर्मचारी साखळी उपोषणास बसले होते. ९० टक्के कर्मचार्‍यांच्या मागण्या मान्य करून पूर्वी असलेल्या १४२ टक्के महागाई भत्त्यात १३ टक्क्यांच्या वेतनवाढीच्या आश्वासनानंतर उपोषण सोडण्यात आले. उपोषणकाळात शनिदेवाच्या दर्शनासाठी येणार्‍या भाविकांना या उपोषणास अडथळा येऊ नये; म्हणून १०० हून अधिक कर्मचारी साखळी उपोषणास, तर ५ कर्मचारी आमरण उपोषणास बसले होते.

‘शनैश्वर देवस्थान’ चौकशीच्या फेर्‍यात !

मुंबई येथील धर्मादाय आयुक्तांकडून अनावश्यक कामगार भरतीची चौकशी, अहिल्यानगर येथील सायबर शाखेकडून ऑनलाईन ॲप दर्शन घोटाळा, देवस्थानाचे उपकार्यकारी अधिकारी नितीन शेटे यांची आत्महत्या आदी घटनांची चौकशी चालू असून ‘शनैश्वर देवस्थान’ चौकशीच्या फेर्‍यात अडकल्याचे दिसून येते.