थोडक्यात महत्त्वाचे (दि. १२ जून २०२५ )

जे.जे. रुग्णालयाच्या वसतीगृहातील विद्यार्थ्याची आत्महत्या !

मुंबई – १० जूनला रात्री १० वाजता भायखळा येथील जे.जे. रुग्णालयाच्या वसतीगृहात एका २२ वर्षीय आधुनिक वैद्यकीय शिक्षण घेणार्‍या विद्यार्थ्याने आत्महत्या केली. रोहन प्रजापती नावाचा हा विद्यार्थी तिसर्‍या वर्षात शिकत होता. ‘अभ्यासाच्या ताणामुळे आणि घरातील आर्थिक अडचणींमुळे त्याने हे पाऊल उचलले’, अशी माहिती पोलिसांनी दिली आहे.

‘अलमट्टी’ची उंची वाढू देणार नाही ! – राधाकृष्ण विखे पाटील

मुंबई – अलमट्टी धरणाच्या वाढीसंदर्भात जलसंपदा मंत्री विखे पाटील म्हणाले की, यासंदर्भात सातत्याने चर्चा चालू आहे. अद्यापही सर्वोच्च न्यायालयात त्याला स्थगिती आहे. राज्य सरकारने त्यामध्ये तेलंगाणा आणि आंध्रप्रदेश यांच्यासमवेत चर्चा केलेली आहे. सरकारची भूमिका हीच आहे की कोणत्याही परिस्थितीत अलमट्टीची उंची वाढू द्यायची नाही.

४ वर्षांत २ सहस्र ३४७ प्रवाशांचा मृत्यू ! – रेल्वे पोलीस

मुंबई – गेल्या ४ वर्षांत धावत्या रेल्वेगाडीतून पडून २ सहस्र ३४७ प्रवाशांचा मृत्यू झाला आहे, अशी माहिती रेल्वे पोलिसांनी माध्यमांना दिली आहे. प्रलंबित रेल्वे प्रकल्प, मुंबईत परप्रांतियांचे वाढते लोंढे, मुंबईजवळील उपनगरांत स्वस्त घरे मिळत असल्याने तिथे वाढलेली लोकसंख्या आदी अनेक कारणांमुळे प्रवाशांची गर्दी वाढली आहे. रेल्वेमार्गिका वाढवल्यास गर्दीचा ताण अल्प होईल, असे रेल्वे प्रवासी संघटनेने म्हटले आहे.

अनावश्यक गर्भाशय शस्त्रक्रिया नकोत ! – आरोग्यमंत्री

मुंबई – अनावश्यक गर्भाशय शस्त्रक्रिया रोखण्यासाठी गर्भलिंग चिकित्सा आणि निदान दक्षता समितीच्या वतीने आता नियंत्रण ठेवण्यात येणार आहे. महिलांच्या अवैध आणि अनावश्यक गर्भाशय शस्त्रक्रिया करणार्‍यांची गय केली जाणार नाही, अशी चेतावणी आरोग्यमंत्री प्रकाश आबिटकर यांनी दिली आहे. बीड जिल्ह्यातील रुग्णालयांत ८४३ ऊसतोड महिला कामगारांच्या गर्भाशयाच्या पिशव्या अवैधरित्या काढल्याचे उघडकीस आल्याच्या पार्श्वभूमीवर त्यांनी वरील चेतावणी दिली आहे.