श्री महालक्ष्मीदेवी मंदिर आणि जोतिबा मंदिर येथे वस्त्रसंहिता लागू !

पश्चिम महाराष्ट्र देवस्थान व्यवस्थापन समितीचे अभिनंदन ! – महाराष्ट्र मंदिर महासंघ

कोल्हापूर – कोट्यवधी हिंदूंचे श्रद्धास्थान असलेले श्री महालक्ष्मी मंदिरात, तसेच जोतिबा मंदिरात ‘पश्चिम महाराष्ट्र देवस्थान व्यवस्थापन समिती’च्या वतीने वस्त्रसंहिता लागू करण्यात आली आहे. मंदिरे ही हिंदु धर्माची आधारशीला असून मंदिरे ही ईश्वरी चैतन्याचा स्रोत असून भाविक आणि भक्त यांना मनःशांती प्रदान करणारी अन् अव्याहतपणे आध्यात्मिक ऊर्जा पुरवणारी केंद्रे आहेत. हिंदु धर्म आणि हिंदु संस्कृती यांच्या रक्षणासाठी अन् हिंदूंच्या जीवनाचा अविभाज्य घटक असणार्‍या मंदिरांचे पावित्र्य जपणे अत्यंत आवश्यक आहे. त्यादृष्टीने पश्चिम महाराष्ट्र देवस्थान व्यवस्थापन समितीने घेतलेला निर्णय हा स्तुत्य आहे, असे प्रसिद्धीपत्रक महाराष्ट्र मंदिर संघाच्या वतीने देण्यात आले आहे.

मंदिर महासंघाचे संयोजक श्री. प्रमोद सावंत, सहसंयोजक श्री. अभिजित पाटील आणि समन्वयक श्री. प्रसाद कुलकर्णी यांनी दिलेल्या पत्रकात म्हटले आहे की, मंदिरातील सात्त्विकता अधिक ग्रहण करायची असेल, तर आचरण आणि वेशभूषा सात्त्विक हवी. वस्त्रसंहितेचा उद्देश भारतीय संस्कृतीच्या परंपरेला साजेशी वस्त्रे परिधान करावेत हा आहे. आधुनिकतेकडे वळतांना वस्त्रसंहितेसंदर्भात पालन व्हावे, या दृष्टीने महासंघाच्या वतीने निवेदन देण्यात आले होते. त्यावर मंदिर प्रशासनाने सकारात्मक निर्णय घेतला. मुंबई येथील श्री सिद्धीविनायक मंदिर आणि जेजुरी येथील श्री खंडोबा मंदिरात वस्त्रसंहिता लागू झाली असून कोल्हापूर जिल्ह्यातील अन्य मंदिरांनीही वस्त्रसंहिता लागू करावी, अशी मागणी आम्ही करत आहोत.