साहाय्यक मोटर वाहन निरीक्षकाची उचलबांगडी

पत्रादेवी तपासणीनाक्यावर भ्रष्टाचार

पणजी, ४ एप्रिल (वार्ता.) – बसमालक संघटनेचे सरचिटणीस सुदीप ताम्हणकर यांनी काही दिवसांपूर्वी पत्रादेवी तपासणीनाक्यावरील भ्रष्टाचार उघड केला होता. या प्रकारानंतर पत्रादेवी तपासणीनाक्यावर सेवेत असलेल साहाय्यक मोटर वाहन निरीक्षक मंदार आडपईकर यांची उचलबांगडी करण्यात आली आहे. साहाय्यक मोटर वाहन निरीक्षक मंदार आडपईकर यांचे वाहतूक खात्याच्या उत्तर गोवा अंमलबजावणी विभागात (पणजी) स्थानांतर करण्यात आले आहे. यासंबंधीचा आदेश वाहतूक खात्याने ४ एप्रिल या दिवशी काढला आहे.

बसमालक संघटनेचे सुदीप ताम्हणकर आदींनी पत्रादेवी तपासणीनाक्यावरील भ्रष्टाचाराच्या विरोधात मार्च मासात आंदोलन केले होते. पत्रादेवी तपासणीनाक्यावर गोव्यात येणार्‍या परराज्यांतील व्यावसायिक वाहनांकडून पैसे उकळण्यात येत असल्याचा आरोप करण्यात आला होता आणि एका पत्रादेवी तपासणीनाक्यावर एवढा, तर राज्यातील सर्व ५ तपासणीनाक्यांवर किती भ्रष्टाचार होत असेल ? असा प्रश्न उपस्थित केला होता. पत्रादेवी येथे मोहीम राबवतांना तेथे सेवेत असलेले साहाय्यक मोटर वाहन निरीक्षक मंदार आडपईकर यांनी बसमालकांना धमकावल्याचा आरोप आहे. ‘साहाय्यक मोटर वाहन निरीक्षक मंदार आडपईकर यांना पत्रादेवी तपासणीनाक्यावरून हटवावे’, अशी मागणी बसमालक संघटनेने केली होती.