लैंगिक छळाप्रकरणी नायर रुग्णालयाच्या अधिष्ठात्यांचे स्थानांतर, चौकशीचे आदेश

मुंबई – मुंबईतील नायर रुग्णालय आणि वैद्यकीय महाविद्यालयात शिक्षण घेणार्‍या एका विद्यार्थिनीने सहयोगी प्राध्यापकाने लैंगिक छळ केल्याविषयी मुंबई महानगरपालिका आणि पोलीस यांच्याकडे तक्रार केली होती. या प्रकरणी मुंबई महानगरपालिकेचे आयुक्त भूषण गगराणी यांना रुग्णालयाच्या अधिष्ठात्यांचे स्थानांतर करण्याचे निर्देश दिले आहे. मुख्यमंत्री एकनाथ शिंदे यांनी या प्रकरणात स्वत: लक्ष घातले असून सखोल चौकशीचा आदेश दिला आहे.

आरोग्य क्षेत्रातील अशा घटना अत्यंत गंभीर आहेत. या प्रकरणाचे अन्वेषण करून दोषींवर कडक कारवाई करू. रुग्णालयातील सर्वांसाठी सुरक्षित वातावरण निर्माण करणे हे आमचे कर्तव्य आहे. या प्रकरणाच्या चौकशीसाठी विशेष समिती स्थापन करण्यात येईल. रुग्णालयातील कर्मचारी आणि विद्यार्थी यांच्या सुरक्षेसाठी अतिरिक्त उपाययोजना राबवण्यात येतील, असे मुख्यमंत्री एकनाथ शिंदे यांनी म्हटले आहे.