सनातन प्रभात > Post Type > बातम्या > राष्ट्रीय बातम्या > चिक्कमगळुरू (कर्नाटक) येथील दत्तपीठ परिसराच्या इस्लामीकरणाचे षड्यंत्र रचले जात असल्याचा दावा !

चिक्कमगळुरू (कर्नाटक) येथील दत्तपीठ परिसराच्या इस्लामीकरणाचे षड्यंत्र रचले जात असल्याचा दावा !

माणिक्यधारा धबधब्याच्या मार्गावर बेकायदेशीर थडगी बांधल्याने हिंदूंमध्ये संताप

चिक्कमगळुरू (कर्नाटक) – हिंदूंचे धार्मिक स्थळ असलेल्या दत्तपीठ परिसरात येथील प्रसिद्ध माणिक्यधारा धबधब्याकडे जातांना बेकायदेशीर हिरवी चादर चढवून नवीन थडगी बांधण्याचे षड्यंत्र रचण्यात आले आहे. दत्तपीठापासून ६ किलोमीटर अंतरावर ही थडगी बांधली जात आहेत, असे म्हटले जात आहे. ‘या माध्यमातून परिसरात अनधिकृतपणे इस्लामच्या खुणा निर्माण केल्या जात आहेत आणि नवीन प्रथा राबवल्या जात आहेत’, असा दावा येथील बजरंग दलाच्या हिंदुत्वनिष्ठांनी केला. दत्तपीठावरील मालकी अधिकारावरून आधीच हिंदू आणि मुसलमान यांच्यात न्यायालयीन लढा चालू आहे. मुसलमान त्या जागेला ‘इनाम दत्तात्रेय बाबाबुडन स्वामी दर्गा’ या नावाने संबोधतात.

या अनधिकृत थडग्यांच्या विषयावर बजरंग दलाचे नेते रघु सकलेशपूर यांनी स्थानिक प्रसारमाध्यमांना सांगितले, ‘धार्मिक बंदोबस्त विभाग आणि पोलीस यांच्या डोळ्यांसमोर हे बेकायदेशीर प्रकार घडत असतांनाही अधिकारी गप्प आहेत. न्यायालयाच्या आदेशानुसार दत्तपीठ परिसरात कोणत्याही नवीन प्रथा किंवा नवीन बांधकामाला अनुमती नाही. तथापि न्यायालयाच्या आदेशाला येथे पायदळी तुडवले जात आहे.’

जिल्हा प्रशासनाने तात्काळ हस्तक्षेप करून हिरवी चादर चढवून उपासना करण्यावर बंदी घालावी आणि बेकायदेशीर थडगी हटवावीत, अशी चेतावणी हिंदु संघटनांनी दिली आहे.

अनधिकृत थडगी उभारण्याची घटना निराधार ! – पोलीस अधीक्षक जीतेंद्र कुमार दायमा

या प्रकरणी ‘सनातन प्रभात’च्या प्रतिनिधीने चिक्कमगळुरूचे पोलीस अधीक्षक जीतेंद्र कुमार दायमा यांच्याशी संवाद साधला. या वेळी त्यांनी दावा केला की, हिंदु संघटनांना मिळालेली माहिती चुकीची आहे. अनधिकृत थडगी उभारण्याची घटना निराधार आहे. दत्तपीठाचे प्रकरण सर्वाेच्च न्यायालयात चालू असून या परिसरात एकही नवे बांधकाम न उभारण्याचा आदेश देण्यात आला आहे. त्या दृष्टीने आम्ही सतर्क आहोत. थडगी उभारल्याची छायाचित्रे ६ वर्षे जुनी असून तो विषय आता उचलला जात आहे. हिंदू-मुसलमानांनी यासंदर्भात शांतता राखली पाहिजे. हा विषय मी स्वत: बजरंग दलाचे रघु सकलेशपूर यांना स्पष्ट केला आहे.

अधीक्षकांच्या या भूमिकेची शहानिशा करण्यासाठी सकलेशपूर यांना संपर्क साधण्याचा प्रयत्न केला, परंतु संपर्क प्रस्थापित होऊ शकला नाही.

संपादकीय भूमिका

कर्नाटकातील थडगीप्रेमी काँग्रेसच्या सत्ताकाळात असे झाले नाही, तरच नवल ! हे षड्यंत्र हाणून पाडण्यासाठी केवळ चिक्कमगळुरूच नाही, तर संपूर्ण राज्यातून हिंदूंनी संघटितपणे यास विरोध केला पाहिजे !

नूतन लेख